Asfalt zaýytynda órt shyǵyp, 10 tonna bıtým janyp ketti – Abaı oblysy

SEMEI. QazAqparat – Abaı oblysyndaǵy asfalt zaýytynda órt shyǵyp, 10 tonna bıtým janyp ketti, dep habarlaıdy QazAqparat tilshisi.

Abaı oblysy Tótenshe jaǵdaılar departamenti baspasóz qyzmetiniń málimetine súıensek, 3 shilde kúni «101» pýltine Aqsýat aýdany Shybyndy aýylynda ornalasqan asfalt zaýytynda órt shyqqany jaıly habar tústi. Oqıǵa ornyna órt sóndirýshiler shuǵyl kelip jetti.

«Qutqarýshylar sol jerge kelgende zaýyt aýmaǵynda bıtýmdy 3 bóshke órtenip jatty. Otpen kúresken órt sóndirýshiler jarty saǵat ishinde aýyzdyqtady. Abyroı bolǵanda, zardap shekken eshkim joq», - delingen aqparatta.

Órttiń naqty neden shyqqany ázirge belgisiz. Tekserý jumystary bastaldy. Belgili bolǵandaı, órt saldarynan 10 tonna bıtým janyp ketken.