Áset Serikbaev: Erkin kúres sheberleri tarıhı jetistikke qol jetkizdi
NUR-SULTAN. QazAqparat - Erkin kúresten Qazaqstan komandasy úshin bıylǵy maýsym tabysty aıaqtaldy, dep habarlaıdy QazAqparat.
Áset Serikbaev baptaıtyn balýandar Azııa chempıonatynan eki altyn enshilese, óz jerimizde ótken álem birinshiliginen úsh medal, tórt joldamaǵa qol jetkizdi. Olympic.kz saıtyna suhbat bergen bas bapker jyldyń basty sporttyq oqıǵalaryna toqtalyp, erekshe jetistigimen kózge túsken balýandarǵa óz baǵasyn berdi.
«2019 jylǵy maýsym biz úshin óte jaýapty boldy. Óıtkeni, qurlyq dodasynan bólek, óz elimizde alǵash ret uıymdastyrylǵan lıtsenzııalyq álem chempıonatynda baq synadyq. Mundaı iri básekede joldamadan bólek, joǵary deńgeıde óner kórsetý, medal alý, jankúıer aldynda uıatqa qalmaý degen faktorlar da bar. Qýanyshqa qaraı, Olımpıada qarsańyndaǵy maýsymdy sátti aıaqtap otyrmyz. Qańtar aıynda Shymkent qalasynda kúres túrlerinen dástúrli Spartakıada ótip, sol synnan soń Azııa chempıonatyna qatysatyn komanda jasaqtaldy. Sáýir aıynda Qytaıda ótken Azııa chempıonatynda Nurǵoja Qaıpanov pen Danııar Qaısanov jeńimpaz atandy. Saıatbek Oqasov fınalda utyldy. Sodan soń Daǵystandaǵy halyqaralyq týrnırge, Italııanyń Sassarı qalasyndaǵy reıtıngilik jarysqa qatysyp, júldeli oryndadan kórindik. Álem chempıonaty qarsańynda Polshada eki aptalyq oqý-jattyǵý jıynyna qatysqanymyz da bar. Nur-Sultandaǵy álem chempıonatynyń nátıjesin barshańyz kórdińizder. Eki qazaq balýany fınalda kúresip, Dáýlet Nııazbekov pen Nurǵoja Qaıpanov kúmis júldeger atandy. Sonymen qatar, birneshe balýanymyz qola júlde úshin kúresip, Nurıslam Sanaev úshinshi orynǵa taban tiredi. Tokıo Olımpıadasyna jeńip alǵan tórt joldamamyz da bar. Shyny kerek, buǵan deıin bizdiń balýandar álem chempıonatynan eki kúmis, bir qola medal alyp kórmegen. Sol sebepti, muny eń úlken nátıje dep aıtar edim. Komandalyq esepte Reseıden keıingi ekinshi orynǵa kóterildik. Bul buryn-sońdy bolmaǵan kórsetkish. Bas bapker retinde Nurǵoja Qaıpanovty jyldyń úzdik sportshysy dep aıtar edim. Nebári 20 jastaǵy balýan bir jylda múmkin bolǵan týrnırlerdiń bárinde bıikten kórindi. Azııa chempıony atanyp, álem birinshiliginiń fınalynda beldesti. Máselen, Dáýlet Nııazbekov pen Nurıslam Sanaevtan biz júlde kúttik. Sebebi, Dáýlet úsh ret Azııany utsa, Sanaev álem chempıonatynda alysqa barǵan balýan. Sondyqtan, olar jaqsy nátıje kórsetýge mindetti edi. Al Álisher Erǵalı men Nurǵoja Qaıpanovtar kútpegen jerden keremet jetistikke qol jetkizdi», - deıdi Áset Serikbaev.