Áset Mataevtyń jubaıy «UBK» QB-dan mıllıondaǵan teńge qarajat alǵan
ASTANA. QazAqparat - Aıda Mataeva klýbta jumys istemegendikten ári onyń múshesi bolyp tabylmaǵandyqtan «UBK» qarajatynan mıllıondaǵan teńge aqshany jalaqy retinde ne úshin alǵanyn túsindirip bere almady.
Bul týraly Seıitqazy, Áset Mataevtardyń isi boıynsha sot talqylaýy barysynda belgili boldy.
Aıda Mataeva Seıitqazy Mataevtyń uly Asqardyń áıeli, ol «QazTAG» HAA» JShS-da menedjer bolyp jumys isteıdi.
Asqar Mataevtyń dekrettik demalystaǵy áıeli sotqa kele almady, sondyqtan búgin sotta onyń kýáger retindegi aıǵaqtaryn Esil aýdanynyń sýdıasy Aqbolat Qurmantaev oqyp berdi.
«UBK» BQ-da jumys istegen joqpyn. Biraq qoǵam S. Mataevqa tıesili ekenin bildim. UBK-ǵa múshelik, mán-jaıdan habarym joq. Múshelik jarnany tólegen joqpyn, klýbta Mataevtan basqa eshkimdi tanymaımyn», - dedi A. Mataeva.
Alaıda bul rette tergeý organdary birneshe jyl ishinde QB esebinen onyń jeke kartochkalyq esepshotyna mıllıondaǵan teńge qarajat aýdarylyp kelgenin habarlady. Banktiń kóshirmesine sáıkes Aıdanyń kartalyq shotyna UBK-den 2011 jyly - 1 mln 903 myń teńge, 2012 jyly - 1 mln 200 myń teńge túsken. Aıda Mataeva tólem sebepteri esh ýaqytta qyzyqtyrmaǵanyn moıyndady, barlyq aqshany jeke qajetine jumsaǵan.
Eske salsaq, budan buryn sot talqylaýy barysynda «Bıznes-aýdıt» sarapshylarynyń «UBK» QB býhgalterlik eseptiligin tekserý nátıjesi jarııalanǵan. Oǵan sáıkes 2005 jylǵy 1 qańtardan bastap 2016 jylǵy 25 aqpan aralyǵy kezeńinde jalpy somasy 606 mln 809 myń 785 teńge, onyń ishinde Seıitqazy Mataevtyń chek kitapshasy boıynsha 474 mln 369 155 teńge aqsha sheship alynǵan.
Sondaı-aq Seıitqazy Mataev meıramhanalarda jeke tulǵalardyń shyǵyndaryn tólegeni anyqtaldy, onyń ishinde onyń jaqyn týystary da bar, jumsalǵan soma - 269 mln teńge.
