Áset Mataev múlki týraly sotqa aqparat berdi
ASTANA. QazAqparat - Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy odan ári jalǵasýda. Búgin sot aldynda sóz sóılegen Áset Mataev ózine tıesili múlkin tyıym salýdan bosatýdy surady. Sot zalynda sýdıa Aqbolat Qurmantaev Áset Mataevtyń ıeliginde «Mıtsýbıshı Padjero», «Toıota Lend Krýzer», «Leksýs 570» markaly úsh avtokólik, Almaty qalasynyń elıtalyq aýdanynda páteri baryn habarlady.
«Meniń «Mıtsýbıshı Padjero» avtokóligin qashan satyp alǵanym esimde joq. Biraq ol komıtetpen shart jasasqanǵa deıin alynǵan. Al ekinshi avtokóligim 1997 jyly shyqqan «Toıota Lend Krýzer»-di Semeıde turatyn aǵama satyp alǵanmyn. Sodan keıinirek óz atyma aýdardym. Bul kólikti ózimniń jınaǵan aqshama satyp aldym. Keıinnen ol eski bolǵandyqtan satyp jiberdim. Sonymen qatar «Leksýs-570»-ti óz qarajatyma alǵanmyn. Ol soǵylǵan kólik, ózim tolyq jóndeýden ótkizdim»,- dep túsindirdi avtokólikteri týraly Áset Mataev. Al Almatydaǵy páterin úlestik qatysý arqyly satyp alǵanyn habarlady.
Aıta ketelik, keshegi sot otyrysynda túsinik bergen Seıitqazy Mataev memleketten kóp aqsha urlamaǵanyn aıtyp, sotty sendirmek bolǵan edi. «Men eshqandaı aqsha urlaǵan joqpyn. Eger kóp aqsha urlasam, oǵan qymbat páterler men avtokólikter satyp almaımyn ba? «Ulttyq baspasóz klýby» qoǵamdyq birlestiginiń qaramaǵynda birde-bir kólik joq. Biz jumys isteıtin jerge jaqyn turatyndyqtan avtobýspen nemese jaıaý qatynadyq. Tipti bankke de jaıaý baratynbyz»,- dedi S. Mataev.
Sotqa deıin júrgizilgen tergeýdiń nusqasy boıynsha, Seıitqazy jáne Áset Mataevtar 2011-2015 jyldary memlekettik aqparattyq saıasatty nasıhattaýǵa bıýdjetten bólingen 300 mln-nan astam teńgeni urlady dep aıyptalýda. Sot barysynda sotqa túsinik bergen kýágerler «Ulttyq baspasóz klýby» qoǵamdyq birlestigi men «QazTAG» halyqaralyq aqparat agenttigi» JShS-niń arasynda zańsyz shart jasalǵanyn aıtty. Atap aıtarlyǵy, memlekettik satyp alý arqyly bıýdjetten bólingen qarajat birneshe jyl boıy «QazTAG» agenttiginiń saıtynda aqyly negizde jarııalanyp kelgen.
Sonymen qatar, Seıitqazy Mataevqa «salyq tóleýden jaltardy» degen aıyp taǵylyp otyr. Ol kásipkerlik qyzmetpen aınalysyp, 2011-2015 jyldary 1,4 mlrd. teńge taza tabys tapqan. Alaıda soǵan qaramastan, 200 mln. teńgeden astam salyq tóleýden jaltarǵan. Sottyń keshegi otyrysynda S. Mataev salyq tóleýde qatelikter jibergenin, sonyń nátıjesinde mıllıondaǵan somany tóleýden jaltarǵanyn moıyndady. «Barlyq esep-qısap jumystarymen meniń marqum dosym - Aleksandr Qımasov aınalysty. Ol ótken jyly 21 qyrkúıekte Máskeýde aýyr naýqastan qaıtys boldy. Shynymdy aıtsam, ózim áli kúnge deıin kompıýtermen jumys isteýdi bilmeımin. Men salyq tóleıtin kezde 130.00 formasyn, 100.00, 101.04 formalaryn tapsyrý kerektiginen habarsyz boldym. Sondyqtan salyq tóleýde qatelikter jibergenimdi moıyndaımyn. Bul jerde jasyratyn eshteńe de joq»,- dep túsindirdi S. Mataev.
Almaty qalalyq memlekettik kirister departamentiniń salyq tólemderi boıynsha tekserýinen anyqtalǵandaı, Seıitqazy Mataev zańdy tulǵa retinde bıýdjetke 168 730 897 myń teńge korporatıvtik tabys salyǵyn tóleýden jaltarǵan. Sonymen qatar, jeke tabys salyǵy boıynsha 2011-2015 jyldary 65 420 741 teńge, rezıdent bolyp tabylmaıtyn tulǵalar úshin 2011- 2014 jyldary 8 578 748 teńge tólenbegen.
Ámirlan Álimjan.
