Áset Maǵaýov: Munaı baǵasy bıyl 65 dollar deńgeıinde saqtalýy múmkin

ASTANA. KAZINFORM — «QazMunaıGaz» ulttyq kompanııasy basqarma tóraǵasynyń orynbasary Áset Maǵaýov munaı baǵasynyń qubylýy janarmaı baǵasyna qalaı áser etetini týraly pikir bildirdi.

— Munaı naryǵy aıtarlyqtaı qubylmaly. Kez kelgen geosaıası nemese ekonomıkalyq faktor munaı baǵasyn túsirip nemese ósirip jiberýi múmkin. «QazMunaıGazǵa» qatysty aıtsaq, munaıynyń 70 paıyzy ishki naryqta satady. Ol baǵalar eksport baǵasynan áldeqaıda tómen. Eksport baǵasy qubylyp jatsa da, ázirge ishki naryqtaǵy baǵa eń tómengi eksport baǵasynyń deńgeıinde qalyp otyr. Sondyqtan biz ishke satatyn 70 paıyz munaıdyń baǵasy qazir syrttaǵy mejelerden táýelsiz. Onyń ústine bizde dızel men benzın eksporty shekteýli — bári óz ishimizde satylady, — dedi ol.

Aıtýynsha, «QazMunaıGaz» AQ munaı naryǵyndaǵy turaqsyzdyqqa daıyn.

— Qalǵan eksportqa ketetin kólem týraly aıtsaq, sarapshylar bıyl munaı baǵasy bir barreline 65 dollar deńgeıinde saqtalatynyn aıtyp otyr. Biraq naqty boljap aıta almaıdy. Jalpy alǵanda biz «QazMunaıGazǵa» eshqandaı qater kórip otyrǵan joqpyz. Balama stsenarıler ázirlengen. Tutastaı alǵanda, munaı baǵasynyń kez kelgen qubylýyna daıynbyz. Kún saıyn qubylyp tur. Al negizi uzaq merzimdegi trend mańyzdy. Sońǵy boljamdar 65 dollar deńgeıinde bolatynyn aıtyp otyr, — dedi Áset Maǵaýov.

Eske salsaq, «Qazaqmysqa» sırek metaldar kontsentratyn zańsyz eksporttap otyr degen aıyptar taǵylyp otyr.