Áset Isekeshev jaýapsyz merdigerlermen kelisimshartty buzýdy tapsyrdy
ASTANA. QazAqparat - Astana ákimi qalany aralaý barysynda Saraıshyq kóshesiniń qurylys qarqynyn tekserip shyqty, dep habarlaıdy elorda ákimdiginiń resmı saıty.
Kósheniń uzyndyǵy 3 km, al jol tósemi 8 jolaqty bolmaq.
Saraıshyq kóshesiniń qurylysy Sh. Beısekova kóshesinen Turan dańǵylyna deıin ári qaraı Syǵanaq kóshesi men Qorǵaljyn tas joly baǵytyna qatar jatqan shaǵyn aınalma joldaǵy kólik aǵynynyń júktemesin jeńildetýge baǵyttalyp otyr. Birinshi kezekte bul Turan dańǵylyndaǵy júktemeni 50% deıin jeńildetedi. Áset Isekeshev joldy osy jyldyń 1 shildesine deıin bitirýdi tapsyrdy.
Ákim sondaı-aq Jangeldın kóshesiniń Beısekova men Kúmisbekovke deıingi qurylys ýchaskesin tekserdi. Sol jerde kólik jáne jol-kólik ınfraqurylymyn damytý basqarmasynyń basshysy Ashat Qaraǵoıshın merdiger uıymnyń kelisimsharttaǵy mindetin atqarmaǵandyqtan, qurylys jumystarynyń sozylyp ketkendigin aıtty.
Obektini qarap shyqqan Áset Isekeshev kelisimshartty buzyp, merdiger uıymdy sotqa berýdi tapsyrdy.
«Biz únemi Astananyń ómir súrýge yńǵaıly qala bolýyn aıtyp kele jatyrmyz. Turǵyndarǵa qolaıly ortany jasaý jol salýshylardyń jumysyna da baılanysty. Osymen ekinshi jyl qatarynan jumysty aıaqtaı almaı kele jatyrsyzdar. Al bul aýdanda 15000 adam turady! Kim oryndap shyǵa almaıdy, Astanada jumys istemeı-aq qoısyn. Mundaı merdigerlermen kelisimshartty buzý kerek. Shara qoldanýdy tapsyramyn!», - dep málimdedi ákim.
Qalany aralaýda ákimge QMRB (Qazaqstan musylmandary rýhanı basqarmasy), Koreıa Respýblıkasy, Malaızııa, QHR elshiliginiń ǵımarattary ornalasqan Qarasaz, Obaǵan, Arǵanaty kósheleriniń qurylys merzimi de kidirip jatqany aıtyldy. Merdigerdiń aıtýynsha, jumystyń keshiktirilý sebebi jobanyń tehnıkalyq shartyna ózgeris engizýimen baılanysty.
Astana ákimi mundaı máseleler men aýa raıynyń kúrt ózgeristeri kósheni paıdalanýǵa berýdiń kestesin keshiktirýge sebep emestigin qadap aıtty. Áset Isekeshev atalmysh kóshedegi qurylys birinshi qyrkúıekke deıin bitýi tıistigin, olaı bolmaǵan jaǵdaıda óz mindetin atqarmaǵan kompanııamen kelisimshartty buzatynyn eskertti.
Sonymen qatar, jyl sońyna deıin Belarýs pen Ózbekstan Respýblıkalary elshiligi mańaıyndaǵy kóshelerden ótetin joldy aıaqtaýdy tapsyrdy.
Ári qaraı Astana ákimi Máńgilik el dańǵylyn aralady. Dostyq pen Qonaev kósheleriniń arasyndaǵy ýchaskeni kórip shyǵyp, ármen qaraı ony keńeıtip, abattandyrý kerektigin jetkizdi.
Esterińizge sala keteıik, osy jyly Astanada qashyqtyǵy 20,8 km 22 jańa kóshe salynady jáne qashyqtyǵy 61,15 km 91 kóshe jóndeýden ótedi. Sondaı-aq, Óndiris, Ońtústik-Shyǵys, Ilınka turǵyn alaptarynda da kóshege qatysty kúrdeli jóndeý jumystary kútip tur.
