Áset Isekeshev velojolmen júretin jaıaý júrginshilerge qatysty pikir bildirdi

ASTANA. QazAqparat - Qala ákimdigi velojolaýshylar úshin salynǵan joldarmen turǵyndardyń júrmeý kerektigin túsindirý jumystary úshin belgili ártister men sportshylardy shaqyratynyn aıtty, dep habarlaıdy QazAqparat tilshisi. 

«Bir jaǵynan túsinem, jańa salynǵan jolmen bári júrgisi keledi, ekinshi jaǵynan, árıne, durys emes. Bul ár adamnyń jol júrý erejesin saqtaý mádenıetine baılanysty. Kóbisi áli bile bermeıdi. Osy turǵyda biz belgili ártister men sportshylardy shaqyryp jatyrmyz, olar halyq arasynda júrip túsindiretin bolady. Bul jerde velojolaýshylarǵa da túsinistikpen qaraý kerek, siz velosıpedpen kele jatyrsyz, aldyńyzda jaıaý júrginshi nemese jas ana qolarbamen ketip bara jatyr, bul árıne, qolaısyzdyq týǵyzady», -dedi Á.Isekeshev.

Onyń aıtýynsha, turǵyndarǵa túsinikti bolý úshin qazirde júgirýge arnalǵan jolaqtar men velojoldar arnaıy tústermen belgilenýde, mysaly, Botanıkalyq baqta qyzyl - velojol, al jasyl - júgirýge arnalǵany kórsetilip, belgi salynǵan. Ákim qala boıynsha barlyq joldarǵa belgi salynatynyn, biraq ol biraz ýaqytty talap etetinin aıtty.

Buryn Astananyń 20 jyldyǵyna oraı qala boıynsha 56 shaqyrym velojol salynatyny aıtylǵan bolatyn. Velojolaýshylarǵa arnalǵan jol Esil aýdanynyń Ortalyq saıabaq mańy, Máńgilik El, D.Qonaev, Dostyq, Qabanbaı batyr, T.Rysqulov, Astana-Qarqaraly jáne Taldykól kóliniń ońtústik-batys bóliginen Qorǵaljyń tasjolyna deıin qamtylǵan. Velojoldyń salyný jobasy boıynsha eni 1,5-3 metrdi quraıdy.  

Aıta keteıik, áleýmettik jeli qoldanýshylary velojoldarmen jaıaý júrginshilerdiń jıi júretinin aıtqan bolatyn.