Áset Isekeshev ShYU elderi qalalarynyń Merler keńesin qurýdy usyndy
«Biz Reseı, Qytaı, Úndistan, Ortalyq Azııa arasynda ShYU elderi qalalarynyń Merler keńesin qurý bastamasyn kóterip otyrmyz. Keńestiń maqsaty - saýda salasyndaǵy yntymaqtastyq, qalalardy damytý salasynda tehnologııalarmen almasý, qala qurylysy, energııa tıimdiligi, jańaratyn energııa kózderi, smart-tehnologııa, qoǵamdyq kóilkterdi damytý, elektrondy kommertsııany damytý, ýnıversıetter arasynda baılanystar. Bul maqsattardyń barlyǵy da ShYU ıdeıasyna saı keledi», - dedi ol.
Onyń paıymynsha, Merler keńesi sessııadan sessııaǵa deıin jylyna bir márte ǵana jumys istemeıtin, ıaǵnı turaqty is-qımylda bolatyn pragmatıkalyq alańǵa aınalýy tıis.
«Jalpy ShYU qurylymynda Úkimet basshylarynyń, Syrtqy ister mınıstrleriniń, ár mınıstrlikpen vedomstvolardyń arnaıy keńesteri qurylǵan. Demek, Merler keńesin qurý bastamamyz da búgingi kúni barynsha ózekti bolyp otyr. Aǵymdaǵy jyldyń kúzinen-aq onyń jumysyn bastap ketýge daıynbyz. Keler jyly birinshi otyrysyn ótkizer edik. Bul bastamaǵa qoldaý bildirseńizder ony Astanada uıymdastyra alamyz», - dedi Áset Isekeshev.
TMD-nyń astanalary men iri qalalarynyń halyqaralyq assambleıasynyń 25-shi sessııasyna qaýymdastyqqa múshe 28 qalanyń 100-ge jýyq ókili, 5 halyqaralyq birlestik pen 7 ǵylymı jáne saraptamalyq uıymnyń ókilderi qatysýda. Shara barysynda qazirgi zamanǵy jahandyq syn-qaterler jaǵdaıynda qalanyń keshendi ári turaqty damýyn qamtamasyz etý boıynsha ınnovatsııalyq sheshimderdi izdestirýge arnalǵan.
Aıta keteıik, bul qaýymdastyq 1998 jyldyń 3 qyrkúıeginde TMD-nyń 9 memleketiniń 19 iri qalalary ákimshilikteriniń bastamasymen qurylǵan bolatyn. Búginde qaýymdastyqqa TMD-nyń 9 eliniń 87 qalasy, onyń ishinde Qazaqstannyń 9 qalasy kiredi.
