Áset Isekeshev saýdany qalaı damytady

"Qala turǵyndary úshin barlyq qyzmetter qoljetimdi bolýy qajet. Sonyń ishinde saýda oryndary da yńǵaıly jerde ornalasýy shart. Sol sebepti biz qazirgi bazarlardy qaıta qurý jumysyn bastap kettik. Astana boıynsha 25 bazar bar. Bıyl jeteýi qaıta qurylady. Qalǵanyn eki jyldyń ishinde aıaqtaımyz. Budan bólek, jańa bazarlar men gıpermarketterdiń qurylysy bastaldy. Sosyn biz "shaǵyn bızneske arnalǵan myń oryn" degen jobany qolǵa aldyq. Atalǵan oryndar barlyq jerlerde ornalasqan. Osy ýaqytqa deıin 600-den astam oryndy taratyp berdik. Endi, aýktsıonnyń kelesi kezeńin bastaımyz. Ony blokcheınniń negizinde ótkizemiz. Sonda ashyqtyq bolady", - dedi Á.Isekeshev "World of Trade 2018" Halyqaralyq konventtiń ashylý rásiminde.

Ákimniń aıtýynsha, búginde Astana kásipkerler qalasyna aınalyp keledi. Elorda ekonomıkasynyń 60 protsentin shaǵyn jáne orta bıznes qurap otyr. 100 myńnan astam kásipker tirkelgen. Olardyń úshten biri saýdamen aınalysady. Elektrondy saýda júıesi de damyp keledi.

"Bizde birneshe saýda-logıstıkalyq termınal salyndy. Osy jumysty jalǵastyratyn bolamyz. Negizgi maqsat - Astanany saýda-sattyq xabyna aınaldyrý. Máselen, Qazaqstanǵa kún saıyn AliExpress arqyly 70 myń sálem-saýqattar keledi. Sonyń 20 protsenti Astanaǵa jetkiziledi. Sóıtip, osy jaqtan basqa aımaqtarǵa taratylady. Qazir elektrondy saýda salasynda 54 kompanııa tirkelgen. Bul tek basy ǵana. Atalǵan sala jyl ótken saıyn keńeıetin bolady", - dep atap kórsetti Á.Isekeshev.

Aıta keteıik, búgin Astanada "World of Trade 2018" Halyqaralyq konvent bastaldy. Jıynǵa saýdagerler, taýar óndirýshiler men rıteılerler keldi. Negizgi maqsat - saýda-sattyqtyń tyń joldaryn anyqtaý.