Áset Isekeshev pen Qýandyq Bıshimbaev elordanyń birqatar saýda nysandaryn aralady
Qýandyq Bıshimbaev pen Áset Isekeshev «Shanhaı» (Kók bazar) jáne «Sharyn» bazarlarynda, «Shapaǵat» kommýnaldyq bazarynda jáne «Magným» saýda ortalyǵynda boldy.
Sapar barysynda qala basshysy áleýmettik mańyzdy ónimderdiń baǵasyn ustap qalý máselesi udaıy elorda ákimdiginiń nazarynda bolatynyn atap ótti.
- Barlyq bazarlardaǵy baǵalarǵa turaqty monıtorıng júrgizetin bolamyz, sondaı-aq qala aýmaǵynda kún saıyn jármeńkeler ótkiziledi. Azyq-túlikter kólikterden satylady. Kókónis, jemis-jıdekter, jarmalar jáne t.b. satý úshin kólikterge kúnde «jasyl dáliz» ashylady. Qant, nan, unǵa kelsek, bul másele monopolııaǵa qarsy qyzmetpen birge zertteledi, ony baqylaýǵa alamyz, - dedi Áset Isekeshev.
Qala basshysynyń aıtýynsha, Qazaqstannyń óńirlerimen aýyl sharýashylyq ónimderin elordaǵa jetkizý boıynsha ýaǵdalastyqqa qol jetkizildi. Baǵalardy ustap qalý boıynsha qabyldanǵan sharalardyń alǵashqy nátıjeleri jaqyn kúnderi belgili bolady, - deıdi Á. Isekeshev.
QR UEM Qýandyq Bıshimbaev óz bazarlarymyzdy qamtamasyz etý kerek ekendigin atap ótti, ol úshin óndirýshiler men kóterme daıyndaýshylardy tartyp, olarmen qarym-qatynastardy retteý kerek, bul ishki naryqty qamtamasyz etýge jol ashady.
- Úkimette naryqty retteýge múmkindik beretin shekti baǵalar tetikteri bar. Ol úshin baǵanyń shegin belgileý kerek, al jergilikti organdar bólshek jáne kóterme saýda bazarlarynda ony qamtamasyz etýge tıis, - dedi mınıstr.
Eske salaıyq, keshe elorda ákimdiginde ótken keńeste qala basshysy áleýmettik mańyzdy taýarlardyń, sonyń ishinde nan, jarma jáne qanttyń baǵasyn ustap qalýǵa baǵyttalǵan birqatar naqty tapsyrmalar berdi. Atalǵan másele boıynsha qabyldanǵan sharalardy úılestirý úshin elorda ákiminiń orynbasary Andreı Lýkınniń jetekshiligimen jedel shtab quryldy.
