Áset Isekeshev óziniń orynbasaryna dári-dármekke qatysty eskertý jasady
ASTANA. QazAqparat - Astana ákimi Áset Isekeshev tegin medıtsınalyq dári-dármekterdi jetkizýge qatysty jaǵdaıdy baqylaýda ustaýdy tapsyrdy. Qala ákimdiginiń baspasóz qyzmetiniń atap ótýinshe, mundaı tapsyrmany elorda ákimi apparattyq keńeste berdi, dep habarlaıdy QazAqparat.
Qalalyq densaýlyq saqtaý basqarmasynyń basshysy Qamaljan Nadyrovtyń sózine qaraǵanda, biryńǵaı dıstrıbıýter - «SK-Farmatsııa» JShS tarapynan dári-dármekterdi jetkizý boıynsha kidirister oryn alyp, búgin emhanalardyń dárihanalarynda birqatar preparat joqtyń qasy.
Keńes qorytyndysy boıynsha qala ákimi tegin medıtsınalyq dárilerdi jetkizýge qatysty kidirister negizinen «SK - Farmatsııa» JShS -ǵa baılanysty ekenin sóz etti. Degenmen de ákimshilik tarapynan tıisti baqylaý jumystary men monıtorıngter júrgizilýi kerek bolatyn. Osyǵan oraı, Áset Isekeshev ákimniń orynbasary Ermek Amanshaev pen densaýlyq saqtaý basqarmasynyń basshysy Qamaljan Nadyrovqa eskertý jasady. Munymen qosa qala basshysy atalǵan máselege qatysty jaǵdaıdy únemi baqylaýda ustaýdy tapsyrdy.
Belgili bolǵandaı, tegin dári-dármekterdi berýdiń ashyqtyǵyn qamtamasyz etý, sondaı-aq, dárilik preparattarmen, medıtsınalyq ónimdermen qamtý jaǵdaıyn únemi monıtorıngten ótkizý maqsatynda qalanyń barlyq emhanalarynda aqparattyq júıe ornatylyp jatyr.
Tegin medıtsınalyq kómektiń kepildendirilgen kólemi aıasynda ótken jyly qala boıynsha ambýlatorlyq deńgeıde tegin dárilik preparattarmen 100 myńnan astam adam qamtyldy. Bıyl tegin dári-dármekpen 120 myńǵa tarta adam qamtylady dep josparlanýda.
Sonymen qatar, dári-dármekterdiń qoljetimdiligin arttyrý maqsatynda densaýlyq saqtaý basqarmasynda dárilik zattar men medıtsınalyq ónimderdi qala emhanalaryndaǵy dárihanalarda tapsyrý jónindegi sheshim shyǵarylǵan bolatyn.
