Áset Isekeshev Ortalyq Azııadaǵy 15 qalanyń basshysyn Astanaǵa shaqyrdy

ASTANA. QazAqparat - Ortalyq Azııadaǵy 15 qalanyń basshysymen kezdesý jyljymaıtyn múlik máseleleri boıynsha Ortalyq Azııa forýmy kezinde ótedi, dep habarlaıdy «QazAqparat» HAA tilshisi forým menedjeri Álııa Serikpaevaǵa silteme jasap.

«Bıyl qala basshylarymen kezdesý ótedi. Áset Órentaıuly (Isekeshev - Astana ákimi) Ortalyq Azııa qalalarynyń basshylaryna shaqyrtý jiberdi. Olardyń ishinde Bishkek, Dýshanbe, Ashhabad pen Tashkent, sondaı-aq Almaty, Shymkent qalalary bar. Sharaǵa 15 qalanyń basshysy qatysady. Birinshi kúni qala basshylarymen kezdesý ótedi. Bul kezdesýde qalalardyń damý máselesi qozǵalady», - dedi Álııa Serikpaeva forým uıymdastyrýshylarmen kezdesýi barysynda.

Aıta keteıik, CRE Central Asia 2017 jyljymaıtyn múlik máselesi boıynsha Ortalyq Azııa forýmy 19-20 qazan kúnderi Táýelsizdik saraıynda ótedi. CRE Central Asia 2017 - Eýropa, Azııa, TMD elderi, Reseı men Ortalyq Azııanyń 15 memleketi jyljymaıtyn múlik naryǵyndaǵy jetekshi sarapshylardyń bas qosatyn oryn.

Forým qazirgi jáne jospardaǵy nysandardy usynýǵa, naryqtaǵy eń ózekti statıstıkalar alýǵa jáne osy saladaǵy sarapshylardyń keısin tyńdaýǵa múmkindik beredi.

Táýelsizdik saraıyndaǵy 2000 tekshe metr ekspozıtsııa aýmaǵynda: saýda-oıyn saýyq ortalyqtary, kópfýnktsıonaldy nysandar, turǵyn úı sektory, keshendi qurylys jobalary, konsaltıngtik jáne basqarýshy kompanııalar, sáýlet, dızaın-bıýro, servıstik kompanııalar, ónerkásiptik nysandar men jer ýchaskeleri, turǵyn úı jobalaryn sátti júzege asyrý úshin tehnologııalar tanystyrylady.