Áset Isekeshev minsiz qalanyń basty sharttaryn atady
ASTANA. QazAqparat - Astanada Jibek joly qala merleri forýmynyń plenarlyq májilisi bastaldy. Sol jerde Astana qalasynyń ákimi Áset Isekeshev minsiz qalany qurýdyń basty talaptary týraly aıtyp berdi, dep habarlaıdy QazAqparat tilshisi.
«Sóz joq, bolashaqta ýrbanızatsııa kúsheıe túsedi. Al iri megapolısterdiń róli artady. Ony tanymal sarapshylar da rastap otyr. Máselen, shved ǵalymdarynyń boljamy boıynsha, 50 jyldan keıin 218 memleket emes, 600 qala ekonomıkalyq turǵyda belsendi bolady. Osylaısha, qalalar jelisi jańa álemniń saıası-ekonomıkalyq qańqasyna aınalady. Іri qalalar ekonomıkanyń basty qozǵaýshy kúshi bolady», - deıdi Á.Isekeshev.
Onyń aıtýynsha, 2050 jylǵa qaraı Qazaqstan halqynyń 70 protsenti qalada turady. Sol sebepti qalalardy damytý máselesine basa nazar aýdarylyp keledi.
«Árıne, ondaı qalalar álemdik trendterge saı bolýy kerek. Sol sebepti biz ondaı qalalardy qurý tájirıbesin jan-jaqty zerttep kelemiz. Olardy árqalaı ataıdy. Megaqalalar, jahandyq qalalar, greenfield cities, new global cities deıdi. Bundaı qalalar óz eliniń ǵana emes, tutas bir aımaqtyń draıverine aınalady. Máselen, Taıaý Shyǵysta - Dýbaı men Abý-Dabı, Ońtústik-Shyǵys Azııada - Sıngapýr jáne taǵysyn taǵy. Atalǵan qalalar ınnovatsııalar, ınvestıtsııalar, densaýlyq, bilim, saýda men týrızmniń negizgi oshaǵy bolyp otyr. Damyǵan ınfraqurylym men sapaly basqarý - qalany damytýdyń basty sharttary. Budan bólek, jahandyq ekonomıkamen baılanysy bar saýda, qalada daryndy adamdardy ustaı bilý saıasaty jáne turaqty ınnovatsııalyq ekojúıe bolýy qajet. Dál osy sharttardyń negizinde minsiz qalany qurýǵa bolady», - dep atap kórsetti Á.Isekeshev.
