Áset Isekeshev mıneraldyq-shıkizattyq salasyndaǵy geologııalyq jumystardyń ahýalyn jaqsartýdy usyndy

«Biz qazirgi kezde Keńes Odaǵy kezindegi geologııalyq zerttelgen jáne barlanǵan qordy paıdalanyp kelemiz. Ekinshiden, bul baǵytta kadr men ǵylym máselesi bar. Buǵan deıin elimizde óte myqty geologııalyq kadrlar bolǵan edi, qazirgi kezde olar qartaıyp keledi. Ókishke qaraı osy kadrlardy almastyratyn jańa mamandardyń qatary sırek. Osy turǵyda úlken problema bar», - dedi mınıstr. Osy oraıda vedomstvo basshysy ókinishke qaraı sońǵy 15-20 jylda geologııalyq barlaý jumystaryna qajetti deńgeıde qarjy bólinbegenin aıtyp ótti.

Á. Isekeshev Qazaqstandaǵy kóptegen qalalar iri ken oryndarynyń mańynda shoǵyrlanǵanyn aıta kele: «atap aıtqanda osy qalalardaǵy ken oryndary qorynyń udaıy óndirisi máselesi óte mańyzdy. Sebebi, bul jumystar júrgizilmese atalǵan qalalardaǵy ahýal tómendeı túsedi», - dedi.

Onyń paıymdaýynsha, mıneraldyq-shıkizattyq keshenin damytý úshin qarjylandyrý kólemin artyrý qajet. Atap aıtqanda aldaǵy 4-5 jylda qarjylandyrýdy arttyrý óte mańyzdy.

«Mıneraldyq keshen qosymsha qundy qamtamasyz etýde, sondaı-aq básekege qabilettilik turǵysyndaǵy yqpaly zor. Sondyqtan bul baǵytty damytyp, joǵary tehnologııalardy engizýimiz qajet. Buryndary bul salaǵa qarjy jetpedi jáne basty nazar basqa máselelerdi sheshýge baǵyttalǵan edi. Endi bul salany basymdyqty túrde damytqan jón», - dep túıindedi sózin Úkimet basshysy Kárim Másimov.

Aıta keteıik, búgin Úkimet otyrysynda 2010-2014 jyldarǵa arnalǵan Qazaqstandaǵy mıneraldyq-shıkizattyq keshendi damytý jónindegi baǵdarlama maquldady. Atalǵan baǵdarlamanyń maqsaty - ónerkásiptiń barlyq salalaryn damytý úshin mıneraldyq-resýrstardy tıimdi jáne keshendi túrde paıdalanýdy qamtamasyz etýge negizdelip otyr.