Áset Isekeshev: Memlekettik qyzmetshiniń árbir sheshimine birden Qylmystyq kodeksti qoldaný durys emes
Otyrysqa Prezıdenttiń Kómekshisi – QR Qaýipsizdik keńesiniń hatshysy Áset Isekeshev, Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov, Parlament Májilisiniń depýtattary, Prezıdent Ákimshiliginiń, Bas prokýratýranyń jáne qoǵamdyq uıym ókilderi men alqa músheleri qatysyp jatyr.
Otyrysta sóz alǵan Áset Isekeshev Prezıdent Qasym-Jomart Toqaevtyń sybaılas jemqorlyqpen kúres baǵytynda bergen sońǵy tapsyrmalaryna toqtaldy.
«Agenttik jumysynyń negizgi jetistiginiń biri halyqtyń sybaılas jemqorlyqqa belsendi qarsy turýy jáne jalpy preventsııanyń jaqsarýy bolýy kerek. Jalpy alǵanda, aldyn alý sharalary memleketke keletin shyǵyndardy boldyrmaýy kerek. Bul jerde asyra silteýge jol berýge bolmaıdy.
Basqarý qateliginen týyndaǵan jemqorlyq qylmystardy azaıtý mindeti tur. Ózderińiz biletindeı, Memleket basshysy múddeli memlekettik organdarǵa osy problemany sheshetin júıeli tetikterdi pysyqtaýdy tapsyrǵan bolatyn. Bul jerde halyqqa, paraqor, jemqorlar laıyqty jazasyn arqalaıtynyn, onymen kúres qatań ári ymyrasyz, júıeli júrý kerektigin naqty aıtý qajet. Sonymen birge memlekettik qyzmetshiniń árbir sheshimine birden Qylmystyq kodeksti qoldaný durys emes, árıne» - dedi Prezıdenttiń kómekshisi.
Qaýipsizdik keńesiniń hatshysy jemqorlyqpen baılanysty qylmystyq ister prokýrorlyq súzgi arqyly qozǵalýy kerektigin basa aıtty.
«Bul iste prokýrorlyq súzginiń áleýetin paıdala otyryp, qylmystyq protsestiń 3 býyndy modelin engizýge basymdyq berilýi kerek. Marat Muratuly, siz osy ıdeıanyń bastamashylarynyń biri retinde Bas prokýratýrada osy máseleni basqarǵan edińiz. Sondyqtan osy modeldi Agenttik te belsendi paıdalanatynyna senimdimin. Bul qylmystyq protsestegi zańdylyqty aıtarlyqtaı kúsheıtedi», - dedi Áset Isekeshev.
