Áset Isekeshev QazUÝ ǵalymdarymen jáne stýdentterimen kezdesti
ASTANA. QazAqparat - Búgin ál-Farabı atyndaǵy QazUÝ-da QR Indýstrııa jáne jańa tehnologııalar mınıstri Áset Isekeshevtiń ýnıversıtet basshylyǵymen jáne jas ǵalymdarmen kezdesýi bolyp ótti.
Bul týraly atalmysh oqý ornynyń baspasóz qyzmetinen habarlady.
Ýnıversıtet rektory Ǵ. Mutanov mınıstrdi mehanıka-matematıka fakýltetindegi NR oqý ortalyǵynyń, «Algorıtm» stýdenttik bıznes-ınkýbatorynyń, «ál-Farabı» ǵylymı kitaphanasynyń, óndiristik ortalyqtyń, «Keremet» stýdentterge qyzmet kórsetý ortalyǵynyń, tehnoparktyń jumysymen tanystyryp shyqty. Tehnoparkte stýdentter men start-ap kompanııalar óz bıznes-jobalaryn kórsetti. Stýdenttermen kezdesý barysynda Á.Isekeshev QazUÝ janynan «Alataý» aqparattyq tehnologııalar parkiniń úshinshi kezegin qurý týraly usynys jasady.
«QR Prezıdenti N. Nazarbaev Joldaýda jańa ekonomıkaǵa kóshý máselesin kóterdi. Almaty bilim men ǵylym ortalyǵy bolyp tabylady jáne ınnovatsııalyq jobalardyń 500-den astamy osynda óndiriske enip jatyr. Bul jerde ınnovatsııalyq jobalardy iske asyrýda úlken múmkindik bar. Biz Elbasy aıtqandaı, bilimge negizdelgen ekonomıkany damytýdy qarastyryp, sapaǵa jumys isteýimiz kerek»,- dedi mınıstr.
Áset Isekeshevtiń aıtýynsha, búginde tehnologııa transferi, tehnologııany kommertsııalaýǵa baǵyttalǵan, ǵylymǵa negizdelgen ekonomıka qalyptastyrylyp, mınıstrlik tarapynan túrli grant bólinip otyr. Sonyń ishinde bıznes ashýǵa, ıdeıalardy qoldanysqa endirýge jáne t.b. ǵylymı jumystarmen aınalysýǵa nıettilerge qoldaý kórsetiledi. Al, bolashaqta QazUÝ janynan qurylatyn klaster, ol ortalyqtandyrylyp, barlyq JOO stýdentteri men jas ǵalymdaryna qoljetimdi bolýy qajet.
