Áset Isekeshev qaıtys bolǵan Talǵat Rysbekovtyń otbasyna kóńil aıtty
ASTANA. QazAqparat - Astana qalasynyń ákimi Áset Isekeshev baqılyq bolǵan qalalyq qurylys basqarmasynyń basshysy Talǵat Rysbekovtyń otbasyna kóńil aıtty, dep habarlaıdy «QazAqparat» HAA tilshisi.
«Búgin túnde Astana qalasy Qurylys basqarmasynyń basshysy Talǵat Rysbekov dúnıeden ótti. Talǵat Tastybaıuly bilikti maman, jaqsy adam edi. Sanaly ǵumyrynyń birneshe jylyn elorda ákimdigine arnap, jaıdary minezimen, tereń bilimimen, adamı jaqsy qasıetimen aınalasyna tanymal bolatyn. Bul qaıǵy bizge de aýyr tıip otyr. Talǵat Tastybaıulynyń týǵan-týystary men jora-joldastaryna qaıǵylaryna ortaqtasyp, kóńil aıtamyn», - dep jazdy qala ákimi óziniń Feısbýktegi paraqshasynda.
Talǵat Rysbekov 3 jeltoqsanda kóz jumǵany týraly budan buryn respýblıkalyq BAQ betterinde jarııalanǵan bolatyn. Basqarma basshysy 1966 jyly ómirge kelgen. Tselınograd ınjenerlik-qurylys ınstıtýtyn aıaqtaǵan. D.Qonaev atyndaǵy ýnıversıtette zańger mamandyǵy boıynsha bilim alǵan. Qurylys basqarmasyn 2015 jyldyń tamyzynan beri basqarǵan.
