Áset Isekeshev elordanyń úzdik túlekterin marapattady
ASTANA. QazAqparat - Búgin «Altyn belgi» ıegerlerin, halyqaralyq, respýblıkalyq olımpıadalar men týrnırlerdiń jeńimpazdary atanǵan túlekterdi ulyqtaýǵa arnalǵan «Elorda maqtanyshy» atty merekelik shara ótti, dep habarlaıdy QazAqparat.
Saltanatty shara barysynda elorda ákimi Áset Isekeshev «Altyn belgi» ıegerlerin, Ulttyq biryńǵaı testileýde joǵary ball jınaǵan túlekterdi, halyqaralyq baıqaýlarda Astana qalasynyń namysyn qorǵap, jeńiske jetken túlekterdi jáne Balalar úıleriniń tárbıelenýshilerin quttyqtap baǵaly syılyqtar tabys etti.
Bıyl elordada 4978 bala mektep bitirse sonyń 4536-sy ulttyq biryńǵaı test tapsyrdy. UBT tapsyrýdan bas tartqan oqýshylardyń sany - 210. Onyń 78-i shetelge oqýǵa tússe, 31-i densaýlyǵyna baılanysty, 15-i jeke ótinishimen test tapsyrýdan bas tartqan. Munan bólek, halyqaralyq olımpıadanyń jeńimpazy bolǵan 49 oqýshy UBT-dan bosatylǵan jáne 37 oqýshy Nazarbaev Ýnıversıtetine oqýǵa túsken.
Astana boıynsha eń joǵary 137 balldy «Nur Orda» mektep lıtseıiniń túlegi Altynaı Ámirhan aldy. 4 oqýshy 135 ball jınady. 1171 oqýshy 100-den joǵary ball aldy. Al jalpy qala boıynsha ortasha ball 84,65-ti quraıdy.
