Áset Isekeshev elordanyń mańyzdy nysandarynyń jumysymen tanysty
ASTANA. QazAqparat - Áset Isekeshev elorda ákimi qyzmetine taǵaıyndalǵan kúnnen bastap qalany aralap, kóshpeli otyrystar ótkizýde. Ákim Astananyń barlyq aýdandarynda bolyp, tirshilikti qamtamasyz etýdiń mańyzdy nysandarymen tanysyp, kóshelerdi tekserdi. Elorda ómirine qatysty kez kelgen másele qala ákimdiginiń otyrystarynda egjeı-tegjeıli zerttelip, qaralatyn bolady, dep habarlaıdy Astana qalasy ákimdiginiń baspasóz qyzmeti.
Qala basshysy aldymen Taldykólge at basyn tiredi. «Bul másele únemi baqylaýda bolýy shart. Memleket basshysy alǵa qoıǵan mindet merziminde oryndalýy tıis», - dedi Á.Isekeshev. Astana ákimi kóldi tazartý boıynsha atqarylǵan jumystarmen, sonyń ishinde sý tazartý boıynsha qosymsha qurylystardy salý jáne qalpyna keltirý jumystarymen tanysty. Aıta keteıik, byltyr Taldykólge shyǵaryndylar jiberý toqtatylǵan, jyl sońyna deıin sý túbi tolyqtaı tazartylmaq.
Sonymen qatar, ákim qala tirshiligin qamtamasyz etýdiń basty nysandarynyń biri JEO-2 jáne JEO-3-te bolyp, elordanyń aldaǵy jylytý maýsymyna daıyndyǵyn tekserdi. 2016-2017 j.j. jylytý maýsymy bastalǵansha JEO-2-de qýattylyǵy 220 Gkal quraıtyn №5, 6 jáne qýattylyǵy 180 Gkal bolatyn №7 qazandyq agregattaryn iske qosý kózdelgen, bul osy jyly jalpy jylý qýattylyǵyn 400 Gkal-ǵa deıin arttyrýdy qamtamasyz etedi. JEO-3-tiń birinshi kezeginiń qurylys jumystary jalǵasýda.
Astana qalasynyń energetıka basqarmasynyń basshysy Baqtybek Japaevtyń aıtýynsha, kásiporynnyń tabysy tutastaı ınvestıtsııalyq baǵdarlamalarǵa baǵyttalǵan. Іs júzinde atalǵan nysandar ózin-ózi qamtamasyz etip, bıýdjet qarjysyn shyǵyndamaıdy. Buǵan qosa, JEO-3-tiń ekinshi kezeńi MJÁ sheńberinde júzege asyrylatyn bolady. Á.Isekeshev energııa kózderin qalpyna keltirý men salý kez kelgen qala, ásirese, Astana úshin mańyzdy strategııalyq mindet bolyp tabylatynyn atap ótti.
Qazirgi kezde JEO-2 jáne JEO-3-te júrgizilip jatqan jumystar jylý shyǵarý tapshylyǵyn ótep, Astananyń barlyq aýdandaryn úzdiksiz jáne senimdi jylýmen jáne elektr energııasymen qamtamasyz etýge múmkindik beredi.
