Áset Isekeshev elordadaǵy eń úzdik ýnıversıtetti atady
ASTANA. QazAqparat - Astana ákimi Áset Isekeshev elordanyń joǵary oqý oryndary arasynda ótken «Jastar Jalyny - 2017» atty shyǵarmashyl jastar festıvaliniń jeńimpazdaryn marapattady. Baıqaý aıasynda Sáken Seıfýllın atyndaǵy Qazaq Agrotexnıkalyq ýnıversıteti eń úzdik dep tanyldy, dep xabarlaıdy QazAqparat.
Atalǵan joǵary oqý orynnyń stýdentteri Astanada eń talantty jastar retinde tanyldy. Jastar festıvaliniń aıasynda 9 nomınatsııa boıynsha ártúrli baıqaýlar ótkizildi. «Estradalyq án», «Halyq bıi», «Eń úzdik jankúıerler baıqaýy», «Eń úzdik beınerolık», «Eń úzdik aspapshy», «Poetıkalyq baıqaý», «Zııatker», «Úzdik teatr qoıylymy» jáne «Fotobaıqaý» atalymdary boıynsha tanymal óner men mádenıet ókilderi jeńimpazdardy saltanatty túrde marapattady. Sharanyń maqsaty - jastardyń azamattyq jáne shyǵarmashylyq belsendiligin arttyrý, daryndy jastardy anyqtaý jáne táýelsizdik taǵylymyn tanyta otyryp, patrıottyq rýhta tárbıeleý.
Festıvalǵa elordanyń joǵary jáne kásiptik-tehnıkalyq oqý ornynan 3000-nan asa stýdent qatysty. Jyl saıynǵy «Jastar Jalyny» festıvali daryndy, belsendi jáne maqsatty Astana jastarynyń súıikti meıramyna aınaldy.
«Astana - jastar qalasy. Munda 250 myń jas, kreatıvti, belsendi adam turady. Búgin osynda bizdiń elimizdiń bolashaǵy jınalyp otyr.
Ataqty kásipker Djek Ma Memleket Basshysy Nusrultan Nazarbaevpen bolǵan kezdesýinde eń qıyn jumystarǵa 22 men 29 jas aralyǵyndaǵy adamdardy alatynyn aıtty. Sebebi olar batyl, belsendi, kreatıvti bolyp kelgendikten, olar kompanııany keremet jetistikterge jetelep keledi degen bolatyn», - dedi Áset Isekeshev saltanatty sharada.
