Áset Isekeshev: Astananyń ekonomıkalyq modeli Sıngapýr men Dýbaıǵa jaqyn
ASTANA. QazAqparat - Astananyń ekonomıkalyq modeli Sıngapýr men Dýbaıǵa jaqyn. Bul týraly Astana ákimi Áset Isekeshev qalalyq máslıhattyń sessııasynda Astana qalasynyń 2017 jyldyń 8 aıynda atqarylǵan ister boıynsha jasaǵan áleýmettik-ekonomıkalyq damý qorytyndysy týraly baıandamasynda málimdedi, dep habarlaıdy «QazAqparat» HAA tilshisi.
«Biz kóp qalanyń tájirıbesin zerttedik. Mysaly, Beıjiń ónerkásipke basymdyq berdi, kóptegen zaýyttar salyndy. Biraq, qazir bul qala ekologııalyq, sý resýrstary máselelerinen zardap shegýde jáne óziniń óndirisin basqa jerge aýystyrýǵa májbúr. Sondyqtan, biz ózimizdiń strategııamyzda tıimdi qyzmet pen zamanaýı óndiriske basa nazar aýdaryp jatyrmyz. Jalpy alǵanda, bizdiń ekonomıkalyq modelimiz jahandyq qalalar retinde Sıngapýr men Dýbaıǵa jaqyn. Atap aıtqanda, Dýbaı Taıaý Shyǵys úshin, al Sıngapýr Ońtústik-Shyǵys Azııa úshin óz makroóńirleriniń ortalyǵy sanalady. EHRO-ny ótkizýdi jáne barlyq ınfraqurylymdy - áýejaıdy, temirjol vokzalyn, qonaqúılerdi jáne taǵy basqany esepke alǵanda - Astana eýrazııalyq makroóńirdiń jahandyq qalasy, Eýrazııanyń elordasy, kongresstik-kórmelik ortalyǵy bola alady», - dedi Áset Isekeshev.
Onyń aıtýynsha, ákimdik 2020 jyly 50 myń sapaly jańa jumys oryndaryn ashatyn jáne kásipkerlikti damytatyn, ekonomıkalyq ósimge aıtarlyqtaı yqpal etetin 10 sektordy anyqtady. Ónerkásiptik kásiporyndardaǵy ınjenerler, IT-mamandar, dárigerler, muǵalimder sapaly jumys oryndary bolyp sanalady. Bıyl 18 myń jumys orny ashylady.
