Áset Isekeshev Astananyń 20 jyldaǵy jetistikterin jarııa etti
ASTANA. QazAqparat - 5 jyldyń ishinde elorda aýmaǵynda 300 myń adamǵa arnalǵan qala salynyp shyqty. Bul týraly Astana ákimi Áset Isekeshev málim etti, dep habarlaıdy QazAqparat.
«Sońǵy 20 jylda jalpy óńirlik ónim 190 esege ósti. Memlekettik bıýdjetke túsimder 80 esege artty, ıaǵnı 1997 jyldaǵy 13 mlrd teńgeden 2017 jyldaǵy trln teńgege deıin jetti. Jıyrma jylda turǵyn úı qurylysyna 1 trln 600 mlrd teńge salynyp, 180 myńǵa jýyq páterdi qamtıtyn 1 265 turǵyn úıler paıdalanýǵa berildi. Sońǵy bes jylda Astanada 9 mln sharshy metrden astam baspana tapsyryldy. Atap aıtqanda, 5 jyldyń ishinde 300 myń adamǵa arnalǵan qala salynyp shyqty, ıaǵnı bul ortasha oblys ortalyǵy sekildi aýmaq Astanada paıda bolǵanyn bildiredi», - dedi Áset Isekeshev «Astana - damý men ınnovatsııanyń 20 jyly» forýmynda.
Osy oraıda qala basshysy bul kórsetkishter úlken jetistikterdi bildiretinin, degenmen aldaǵy ýaqytta da eleýli jumystar kútip turǵanyn atap ótti.
«20 jylda Astanada 1172 óndiristik, áleýmettik-mádenı ári qoǵamdyq mańyzdaǵy nysandar salyndy. Negizgi kapıtalǵa ınvestıtsııalardyń jyldyq kólemi 1997 jyldan beri 44 esege ósti jáne 20 jylda jalpy 8 trln teńgeni nemese 47 mlrd dollardy qurady. Bul úderis 2017 jyly da jalǵasyn tapty, ıaǵnı EKSPO-ny ótkizýdiń arqasynda bizde oń ekonomıkalyq kórsetkishter baıqaldy. 2017 jyly elordanyń ekonomıkasyna 945 mlrd teńge ınvestıtsııa tartylyp, onyń ishinde 70 paıyzy jeke ınvestıtsııalar», - dep naqtylady Astana ákimi.
