Áset Isekeshev Astanany damytýda mańyzy zor ekonomıkanyń 10 basym baǵytyn aıqyndady
ASTANA. QazAqparat - Astana ákimi Áset Isekeshevtiń aıtýynsha, bul iste álemdik tájirbıe zerttelip, megapolısterdiń ekonomıkalyq qurylymy saraptalǵan , dep habarlaıdy Elorda Info.
«Qazirgi artyqshylyqtarymyzdy eskere otyryp biz turaqty ekonomıkalyq órleýge negiz bolatyn 10 basym baǵytty anyqtap otyrmyz. Onyń 5-eýi saýda-sattyqqa qatysty: týrızm, zamanaýı óndiris, qarjy ortalyǵy, memlekettik sektor, halyqaralyq uıymdar jáne transulttyq kompanııalar isindegi qyzmet kórsetý. Sonymen qatar, qoldaý kórsetý kózdelgen 5 sala bar: bilim, densaýlyq saqtaý, saýda jáne logıstıka, mádenıet pen sport, kreatıvti sektor», - dedi Á. Isekeshev.
Ákimshilikte ár sektor boıynsha salaaralyq damý strategııasy ázirlenip jatyr. Máselen, týrızm salasy boıynsha 3 negizgi baǵyt naqtylandy - iskerlik jáne oqıǵaǵa baılanysty týrızm, demalys aımaǵy jáne medıtsınalyq týrızm.
Ákimniń aıtýynsha, strategııa qazan aıynda «Atameken» ulttyq kásipkerlik palatasy men salaaralyq kompanııalardyń nazaryna usynylady.
«Osy jumys qorytyndysynan keıin biz ınvestıtsııa tartý jáne ınnovatsııalardy damytýǵa qatysty eki jańa strategııa daıyndaımyz», - dep atap ótti qala basshysy.
10 basym baǵytty iske asyrý jáne jalpy kásipkerlikti damytý úshin elordada 5 jergilikti baǵdarlama júzege asady. Olar: Astana Bıznes, Astana-ZhasStarT, Astana Service, Astana Retail, Astana Startup. Tutastaı alǵanda jergilikti baǵdarlamalar boıynsha quny 6 mlrd teńgelik 116 joba qoldaýǵa ıe boldy. Nátıjesinde shamamen 1000 jańa jumys orny ashylyp, 350 jumys orny saqtalyp qaldy.
Aıtalyq EKSPO qarsańynda qonaq úıler, akvapark, delfınarıı sekildi nysandar memlekettik qoldaýǵa ıe boldy.
