Áset Isekeshev Astanadaǵy áleýmettik mańyzy bar nysandardy aralady
ASTANA. QazAqparat - Astana ákimi qaladaǵy áleýmettik mańyzy bar nysandardy aralady. Balabaqsha, mektep, turǵyn úılerge kiretin joldar yńǵaıly ári qaýipsiz bolýy tıis, dep málimdedi Áset Isekeshev nysandardy aralaý barysynda.
Bul týraly elorda ákimdiginiń medıa ortalyǵy habarlaıdy.
Qala basshysy №73 fızıka-tehnıkalyq mektebine bardy. Munda oqý ǵımaratynyń aınalasyndaǵy ınfraqurylym máselesi qordalanyp qalǵan. Mekteptiń aınalasyndaǵy qarqyndy júrip jatqan qurylystyń saldarynan ata-analar men oqýshylar aınalyp ótýge májbúr bolǵan. Mekteptiń janynda avtobýs aıaldamasy joq, kósheni jaryqtandyratyn shamdar jetkiliksiz, qurylys aýmaǵy qorshaýsyz jatatyn.
Burnaǵy ótken apparat jınalysynda Á.Isekeshev aýdan ákimderi men tıisti basqarmalarǵa 28 bilim oshaǵyndaǵy jaıaý jol júrginshileri men júretin joldyń jetkiliksizdigin sheship, jolǵa qoıyńdar dep tapsyrma bergen bolatyn.
Osyǵan baılanysty qala ákimi jaýapty tulǵalarǵa qatań sógis berip, aýdandaǵy qalǵan bilim mekemelerindegi olqylyqtardy retteýge bir apta merzim berdi.
«Mektepke deıingi joldar men kire beristegi joldar balalar men ata-analar úshin yńǵaıly ári qaýipsiz bolýy kerek. Oqýshylar mektepke deıin kedergisiz jetýi tıis. Ony jasaý - qalalyq bıliktiń mindeti. Biz balalarǵa sapaly bilim alý úshin jaǵdaı jasaýǵa mindettimiz», - dedi Á.Isekeshev.
№ 75 mektepte de sheshilmeı qalǵan máseleler bar. Munda avtoturaqtyń joqtyǵynan kishigirim jaıaý jol júrginshilerin qurý qaýipti bolyp tur eken. Máseleniń sheshimi tabyldy. Astana qalasynyń Avtomobıl joldary basqarmasynyń basshysy Ashat Qaraǵoıshınge avtoturaqtyń qurylysy men kireberis joldardy keńeıtýdi tez arada sheshýdi tapsyrdy.
Ákim budan keıin «Saraıshyq» turǵyn alabyna soqty. Áset Isekeshev «Almaty» aýdanynyń ákimine móltekaýdandaǵy kireberis joldardyń qurylysyn sheship, sonymen qatar turǵyn úı alabynyń aýmaǵyn abattandyrýdy tapsyrdy. Aýdan ákimi Ádilbek Sársenbekovke kósheler men aýlalardy jaryqtandyrý mindetteldi. Sondaı-aq, Baıantaý, Saryn jáne M.Jumabaev kóshesiniń qurylysyn kelesi jylǵa deıin bitirýin tapsyrdy. Syǵanaq kóshesinen Túrkistan kóshesine deıin jaıaý jol júrginshileri ótkelin ornatýǵa tapsyrma berdi.
Qazirgi tańda turǵyndar jol jabyndysy joq dep jıi shaǵymdanǵan kóshelerde qurylys qarqyndy júrip jatyr. Qalalyq ákimdiktiń málimeti boıynsha, jyl sońyna deıin turǵyn úı alabyna aparatyn 50 kóshe salynyp bitedi. Máselen, Aqan seri kóshesindegi qurylys aıaqtaldy. Qala ákimi qurylys jumystarynyń sapasyn tekserip, jol jóndeýshiler jibergen kemshilikterdi túzeýge naqty tapsyrmalar berdi.
