Áset Isekeshev: Astanada sý basý qaýpi bar ýchaskeler azaıdy
ASTANA. QazAqparat - Astana ákimdigi kóktemgi sý tasqynymen týyndaýy múmkin qaýiptiń aldyn alý úshin keshendi is-sharalar josparyn qurdy. Bul týraly elorda ákimi Áset Isekeshev QR Úkimetiniń otyrysynda aıtty, dep habarlaıdy QazAqparat.
«Osy josparǵa sáıkes sý basý qaýpi joǵary ýchaskelerdiń tolyq tizbesi jasaldy. Olardyń sany 37-den 27-ge qysqarǵanyn aıta ketý kerek. Ár ýchaske boıynsha júrgiziletin jumys túrleri, kólemi, qajetti materıal, qarjylandyrýǵa jaýapty adamdar belgilendi. Barlyq turǵyn úıler eskerilgen, onyń ishinde Ilınka, Óndiris, Kóktal, Jeleznodorojnyı, Prıgorodnyı, Ońtústik-Shyǵys jáne taǵy basqalary bar. Sonymen qatar jańa temirjol vokzaly, áýejaı, Gaz apparatýrasy zaýyty aýmaqtaryna erekshe nazar aýdaryldy», - dep keltirdi Á.Isekeshevtiń sózin Astananyń medıa ortalyǵy.
Astana ákiminiń aıtýynsha, gıdrotehnıkalyq qurylǵylardyń qaýipsiz rejimde jumys jasaýy baqylaýǵa alynǵan jáne kestege sáıkes «Astana sý qoımasynyń 2017 jyldyń sáýirinen 2018 jyldyń naýryz aıy aralyǵyndaǵy jumys rejimi» bekitilgen. «Astana qalasyn Esildiń tasqyn sýlarynan qorǵaý» (Astanalyq sý rettegishi) obektisinde jóndeý-qalpyna keltirý jumystary júrgizilýde, aıaqtalýy - 2017 jyldyń 15 jeltoqsany.
Budan basqa, kóktemgi sý tasqyny kólemin anyqtaý boıynsha «Qazgıdromet» RMK-men birlesip Moıyldy jáne Esil ózenderi basseınderin marshrýttyq tekserý kartasy ázirlendi (2018 jyldyń qańtar, aqpan, naýryz, sáýir aılarynyń birinshi jartysy).
«Eń mańyzdy shara - qar shyǵarý. Sý tasqynyn boldyrmaý jáne aldyn alý úshin qala aýmaǵynan qardy qarqyndy túrde shyǵarý birinshi kezektegi sharalar bolyp qalýda. Qys mezgilinde qala kóshelerin tazalaýǵa 1 840 arnaıy tehnıka men úsh myńǵa jýyq jumysker jumyldyrylady», - dedi Á.Isekeshev.
Astana qalasynyń ákimi «Maıbalyq kóli - «Nura-Esil» kanaly» sý aǵyzý kanalyn keńeıtý týraly da aıtty.
«Áýejaıdyń ushyp-qoný alańyn sý basý qaýpinen saqtaý úshin Maıbalyq ózeninen keletin sýdy kedergisiz ótkizý kólemin arttyrý boıynsha «Nura-Esil» (uzyndyǵy 5,4 kılometrdi quraıtyn) kanalynyń túbin keńeıtý jáne jaǵalaý eńisterin nyǵaıtý qarastyrylǵan (2018 jyldyń naýryz aıy)», - dep habarlady shahar basshysy.
Sonymen qatar «Kishi Taldykól» ózeni jáne Ilınka turǵyn úı alabyndaǵy dambynyń jan-jaǵyn bekitý boıynsha jumystar júrgiziledi. Qazirgi kezde jumys kóleminiń aýqymy, jumysqa jaýapty memlekettik mekeme jáne qurylys kompanııasy anyqtaldy.
Al Gaz apparatýrasy aýdany aımaǵynda Esil ózeniniń arnasyn keńeıtý qarastyrylǵan. Qala bıligi atalmysh aımaqty jıi sý basyp qalý máselesi baryn aıtady. Bul másele Esil ózeniniń arnasyn keńeıtý qurylysy aıaqtalǵan kezde sheshilýi tıis.
«Búginde biz TJ faktilerin boldyrmaý maqsatynda ázirlengen sharalardy iske asyrýǵa kiristik, sonyń ishinde «Jol kartasy» sheńberinde «2017-2020 jyldarǵa arnalǵan tasqyn qaýpiniń aldyn alý jáne joıý boıynsha is-sharalar kesheni» jáne «Arnany qaıta jańartý jobasy» boıynsha № 1, 2, 3, 5-shi jer ýchaskelerin bosatý (barlyǵy 152 jer ýchaskesin alý kózdelgen, qazirgi kúni 26 jer ýchaskesi alynǵan)», - dedi qala ákimi.
