Áset Isekeshev Astana jurtyn mádenıetti bolýǵa shaqyrdy
ASTANA. QazAqparat - Astana ákimi Áset Isekeshev elordada «Smile Astana» jobasyn bastaýdy usyndy, dep xabarlaıdy QazAqparat.
«Dostar, qalamyzda «Smile Astana» jobasyn bastaıyq jáne Astana turǵyndarynyń erejesin jasaıyq. Bir-birimizge jyly lebiz bildirip júreıik, qarttarǵa kómektesip, kezekte egde kisilerge, bolashaq analarǵa jol bereıik. Bir-birimizge syılastyq tanytatyn bolaıyq», - dedi qala basshysy «Jastar jalyny-2017 festıvaliniń saltanatty rásiminde.
Onyń sózinshe, bul Astanada qolǵa alynǵaly jatqan jalǵyz joba emes. Nursultan Nazarbaevtyń reformalary aıasynda elordada «Astana - joǵary mádenıetti qala» atty joba da iske asyrylmaq.
«Bizge meıramxanalarda, qonaq úılerde, qoǵamdyq kólikte, mádenı oryndarda ózin-ózi ustaý mádenıetin damytý qajet. Bizge Astanany mádenı ortalyqtardyń birine aınaldyrý kerek», - dedi ol.
Taǵy bir joba «Astana - eń taza qala» dep atalady. Elorda ákimi jastardy qalada tazalyq saqtaýǵa shaqyrdy.
«Biz qoqysqa qarsy kúres júrgizýimiz kerek. Jastarǵa osyndaı ustanymdy berik ustanǵan jón. Árbir turǵyn, árbir stýdent, árbir dúken ózinen bastasyn. Bizde senbi kúni senbilikke shyǵýdyń jaqsy dástúri saqtalǵan. Osy senbide jalpyqalalyq senbilik ótedi. Sizderdi osy sharany qoldaýlaryńyzdy suraımyz», - dep atap ótti ákim.
Sonymen qatar Áset Isekeshev elordany deni saý ári sportpen shuǵyldanatyn adamdardyń qalasyna aınaldyrýdy josparlap otyrǵandyǵyn jetkizdi.
«Biz barlyq astanalyqtardy sportqa tartyp, zııandy ádetterden arylýǵa shaqyrýymyz kerek. Men jaqynda Respýblıka dańǵylymen kele jatyp, buryn túngi klýb bolǵan ǵımaratta fıtnes-klýb ashylǵanyn kórip, qatty qýandym», - dedi ákim.
Áset Isekeshev Astanada aqyldy texnologııalar engiziletinin de xabarlady.
Onyń pikirinshe, Astana qarqyndy damyp jatqan texnologııalardy belsendi ıgerýi tıis.
«Biz osy máselede 6 baǵyt boıynsha, 20 jobany qolǵa almaqpyz. Olar Astananyń bizdiń aımaqta alǵashqy aqyldy qala atanýyna septigin tıgizedi», - dedi qala basshysy.
