Áset Isekeshev: Astana turǵyndarynyń sany 3,5 esege artty

ASTANA. QazAqparat - Astana qalasynyń turǵyndarynyń sany 3,5 ese ósip, mıllıonnan asty. Bul týraly búgin elordanyń 20 jyldyǵyna arnalǵan halyqaralyq ǵylymı-tájirıbelik konferentsııada shahar basshysy Áset Isekeshev aıtty, dep habarlaıdy QazAqparat tilshisi.

Elorda ákiminiń aıtýynsha, Astana 20 jyldyń ishinde seriktestik pen suhbattyń tıimdi negizderin qalyptastyrýdaǵy bastamalary arqyly qarqyndy damydy, álem moıyndady. Buǵan kýá sońǵy jyldary qalada ótken birneshe halyqaralyq mańyzy bar sharalar. Qazaqstan úshin Astanany Eýrazııa keńistigindegi ınnovatsııalar men sáýlettiń, saýdanyń, densaýlyq qorǵaý men bilim berýdiń ortalyǵyna aınaldyrý aıryqsha mańyzdy.

«Osy turǵyda qalanyń damýymen qatar demografııalyq úlesiniń de róli bar. Qala turǵyndarynyń sany 3,5 ese ósip, mıllıonnan asty. Ekonomıka ınvestıtsııalarynyń jyldyq shamasy 44 ese ulǵaıdy. Osy oraıda qalanyń ekonomıkalyq jáne geografııalyq turǵydan serpindi damýy elordamyzdy qazirgi ýrbanızatsııa men joǵarǵy ómir sapasynyń úlgisine, ınnovatsııa jańalyqtarynyń ortalyǵyna aınaldyrmaq. Álemdik saıasat jáne dıplomatııa ortalyqtarynyń joǵarǵy standarttaryna beıimdelý nátıjesinde Astanaǵa jańa, bıik mindetter qoıyldy», - dedi Astana qalasynyń ákimi Áset Isekeshev.

Aıta ketsek, QR Tuńǵysh Prezıdenti-Elbasy kitaphanasy, QR Syrtqy ister mınıstrligi, QR Tuńǵysh Prezıdenti-Elbasy qory uıymdastyrǵan halyqaralyq konferentsııaǵa BUU, EO, EQYU, IYU halyqaralyq uıymdarynyń ókilderi qatysty. 

Dáýlet Іztileý