Áset Isekeshev Astana-Temirtaý kúre jolynyń qurylys barysymen tanysty
ASTANA. QazAqparat - QR Investıtsııalar jáne damý mınıstri Áset Isekeshev Astana-Temirtaý avtojolynda júrgizilip jatqan jańartý jumystarynyń barysymen tanysty jáne osy jobanyń merdiger mekemeleriniń basshylarymen kóshpeli keńes ótkizdi, dep habarlaıdy QR Prezıdenti janyndaǵy Ortalyq kommýnıkatsııalar qyzmetiniń resmı saıty.
Astana-Temirtaý avtojolynyń uzyndyǵy - 171 shaqyrym. Joba boıynsha ol 1-shi sanattaǵy 4 qatarly betondy jolǵa aýystyrylady.
«Avtojoldaǵy qurylys jumystary 2013 jyly uzyndyǵy 22 shaqyrymdyq 2 ýchaskede bastalǵan bolatyn. Qazirgi ýaqytta jalpy uzyndyǵy 109 shaqyrymdyq 5 ýchaskede jumystar júrgizilýde. Qurylys jumystaryn 5 merdiger mekeme is atqarýda, jol-qurylys tehnıkasynyń 640 birligi, 5 beton tóseý kesheni men 5 zaýyt jumyldyrylǵan. 1 myńnan astam adam jumysqa tartylǵan. Aǵymdaǵy jyldyń qyrkúıeginde taǵy eki ýchaskede merdigerler anyqtalyp, avtojol túgeldeı qurylys jumystarymen qamtylatyn bolady», - delingen habarlamada.
Jyldyń aıaǵyna qaraı alǵashqy 12 shaqyrym jol paıdalanýǵa beriledi dep kútilýde. Jobany aıaqtaý tolyǵymen 2016 jylǵa josparlanǵan. Keńes qorytyndylary boıynsha Áset Isekeshev jumys qarqynyn ulǵaıtýdy, sapa baqylaýyn qatańdatýdy jáne búkil ýchaske boıynsha qaýipsiz qozǵalysty qamtamasyz etýdi tapsyrdy.
