Áset Isekeshev áleýmettik jelilerde paraqshalaryn ózi júrgizedi
ASTANA. QazAqparat - Astana qalasynyń ákimi Áset Isekeshev áleýmettik jelilerdegi paraqshalaryn jeke ózi júrgizedi. Bul týraly búgin Ortalyq kommýnıkatsııalar qyzmetindegi baspasóz máslıhatynda elorda ákimdigi janyndaǵy «ElordaAqparat» JShS medıaholdınginiń dırektory Qaısar Jumabaıuly málim etti, dep habarlaıdy QazAqparat.
«Ol paraqshalardy ózi júrgizedi. Sonymen qatar ákim jelide kóterilgen máselelerdi bizge joldap, ony baqylaýǵa alýdy tapsyryp jatady. Bizde WhatsApp jelisinde negizgi baǵyttar boıynsha birneshe toptar bar. Bul turǵyda kólik, TKSh, densaýlyq saqtaý, bilim jáne ózge de mańyzdy salalar baǵytynda jeke habar retinde kelip túsken máselelerdi ákim baqylap otyrady, sondaı-aq olardy osy toptarǵa da jiberedi»,-dedi Qaısar Jumabaıuly.
