Áset Isekeshev 300 astanalyqqa páter kiltin tabys etti
ASTANA. QazAqparat - 5 shilde kúni Astana ákimi Áset Isekeshev R. Qoshqarbaev dańǵylyndaǵy 50 jáne 50/1 mekenjaıynda salynǵan úıdiń jańa qonys ıelerine kiltterin tabys etti. Páter alýshylardyń ishinde 164-i áleýmettik osal toptarǵa jatatyn kezektegiler, dep habarlaıdy elorda ákimdiginiń resmı saıty.
Jańa qonys ıelerin quttyqtaǵan Áset Isekeshev astanada halyqtyń barlyq tobyna arnalǵan baspanaǵa qoljetimdiliktiń artyp kele jatqanyn aıtty.
«Búgingi oqıǵa - bizdiń barlyq kezektegiler úshin úlken qýanysh. Jańa páter sizderdiń otbasylaryńyzǵa ıgilik pen bereke, qýanyshty sátterdi kóptep alyp kelsin. Sizderdi eki mereke: jańa qonystaryńyzben jáne Astananyń mereıtoıymen quttyqtaımyn», - dedi Áset Isekeshev.
Ferızat Tasmaǵambetova armandaǵan úsh bólmeli páterin uzaq jyldar kútti. Búginge deıin ol otbasymen jalǵa beriletin páterde turyp kelgen.
«Ýaqyt degen tez ótedi eken, men dál mereke qarsańynda - Astana kúninde kiltti ákimniń óz qolynan alamyn dep oılaǵan da joqpyn. Qýanyshymda shek joq. Barlyq qazaqstandyqtarǵa óziniń baspanasy bolyp, baqytty ómir súrýin tileımin», - dedi jańa qonys ıesi.
Jańa turǵyn úı keshenine 300 otbasy qonys tebedi. 328 páterli kópqabatty keshen «Nurly jer» turǵyn úı qurylys baǵdarlamasyn iske asyrý sheńberinde salynyp, paıdalanýǵa berildi. Saltanatty sharadan keıin Astana ákimi birneshe páterge kirip shyǵyp, jańa qonys ıelerin quttyqtady.
Astananyń sol jaǵalaýyna salynǵan úı Nájimedenov dańǵyly men Baıtursynov kóshesindegi yńǵaıly transport jolaıyryǵymen shektesip jatyr. Jaqyn mańaıda astananyń Ulttyq mýzeı, Beıbitshilik pen kelisim saraıy, «Áziret Sultan» meshiti sııaqty mádenı nysandar ornalasqan.
Qazirgi tańda turǵyn úı salasyndaǵy ahýal Memleket basshysynyń bes áleýmettik bastamasy boıynsha qosymsha mehanızmder men qurylystyń qarqynyn esepke alǵanda, aıtarlyqtaı jaqsaryp keledi.
Esterińizge sala keteıik, jýyrda R. Qoshqarbaev 39 dańǵylynda salynǵan úıdiń ıeleri de ákimniń qolynan páter kiltin alǵan bolatyn.
Osy jyly 1000 páterden astam jalpy alańy 60,58 myń sharshy metrdi quraıtyn 6 kópqabatty úıler paıdalanýǵa beriledi dep josparlanýda.
