Áset Erǵalıev SQO-da qandaı medıtsına jáne bilim berý nysandary salynatynyn aıtty

NUR-SULTAN. QazAqparat – Soltústik Qazaqstan oblysynda úsh aýysymdy jáne apattyq jaǵdaıdaǵy mektepterdi joıý maqsatynda 16 mektep salynady. Bul týraly Úkimet otyrysynda SQO-nyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrý kezinde QR Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Densaýlyq saqtaý jáne bilim berý júıeleri qyzmetteriniń qoljetimdiligi men sapasyn arttyrý úshin qazirgi zamanǵy ınfraqurylym qurý kózdelgen. Oblystyq kópbeıindi aýrýhana, sondaı-aq aýdan ortalyqtarynda, tirek jáne spýtnıktik aýyldyq eldi mekenderde 47 medıtsınalyq nysan salynady», - dedi mınıstr.

Onyń aıtýynsha, úsh aýysymdy jáne apattyq jaǵdaıdaǵy mektepterdi joıý maqsatynda 16 mektep salynady. Sondaı-aq, erekshe bilim berilýine qajettiligi bar balalarǵa arnalǵan 400 oryndyq ońaltý mektep-ınternatynyń qurylysy josparlanyp otyr. Sonymen birge, Nazarbaev Ýnıversıtetiniń jáne Akademııalyq kóshbasshy ortalyǵy tájirıbesi boıynsha JOO qurylatyn bolady.

Budan bólek, kýrsanttardyń turǵyn úı-turmystyq jaǵdaıyn jaqsartý jáne ofıtserlerdi daıarlaý sapasyn arttyrý maqsatynda Ulttyq ulan Áskerı ınstıtýtynyń ǵımarattary men qurylystaryn salý josparlanyp otyr.

Budan buryn habarlanǵandaı, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy. Ony iske asyrýdyń jalpy somasy 1,8 trln teńge.