Áset Erǵalıev Investıtsııalar tartý jónindegi keńes tóraǵasynyń orynbasary bolyp taǵaıyndaldy
Úkimette QR Premer-Mınıstriniń birinshi orynbasary Roman Sklıardyń tóraǵalyǵymen jańa formatta ótkizilgen Investıtsııalardy tartý jónindegi keńestiń (ınvestıtsııalyq shtab) kezekti otyrysy ótti, dep habarlaıdy Kazinform Úkimettiń baspasóz qyzmetine silteme jasap.
Otyrysty asha otyryp, Roman Sklıar Investıtsııalyq shtab múshelerine Investıtsııalar tartý jónindegi keńes tóraǵasynyń orynbasaryn tanystyrdy. Bul qyzmetke QR Prezıdentiniń ekonomıkalyq máseleler jónindegi kómekshisi Áset Erǵalıev taǵaıyndaldy. Investıtsııa tartý máselesi Memleket basshysynyń erekshe baqylaýynda ekeni atap ótildi.
Áset Erǵalıev 1986 jyly Qostanaı qalasynda dúnıege kelgen.
2008 jyly Qazaqstandyq menedjment, ekonomıka jáne boljamdaý ınstıtýtyn (QMEBI) memlekettik saıasat ekonomıkasy salasynda bakalavr dárejesimen, sondaı-aq halyqaralyq almasý baǵdarlamasy aıasynda Shvetsııadaǵy Halyqaralyq Ionkopıng bıznes mektebin halyqaralyq ekonomıka salasynda ǵylym bakalavry dárejesimen bitirgen.
2009 jyly Iork ýnıversıtetin, 2010 jyly Nottıngem ýnıversıtetin (Ulybrıtanııa) bitirip, ekonomıkadaǵy ǵylym magıstri dárejesimen támamdaǵan.
2010 jylǵy qyrkúıekten 2013 jylǵy qańtarǵa deıin Londondaǵy Eýropa qaıta qurý jáne damý banki Ekonomıkalyq departamentiniń Shyǵys Eýropa jáne Kavkaz boıynsha óńirlik taldaýshysy retinde eńbek etken.
2013 jylǵy qańtardan 2016 jylǵy maýsymǵa deıin QR Ulttyq ekonomıka mınıstrligi janyndaǵy «Ekonomıkalyq zertteýler ınstıtýty» AQ vıtse-prezıdenti, basqarma tóraǵasynyń orynbasary, basqarma tóraǵasynyń birinshi orynbasary, basqarma Tóraǵasy qyzmetterin atqardy.
2016 jylǵy qazan-jeltoqsan aralyǵynda – «Báıterek «UBH» AQ Basqarma Tóraǵasynyń keńesshisi.
2016 jylǵy jeltoqsannan 2017 jylǵy tamyzǵa deıin – QR Premer-Mınıstriniń keńesshisi.
2017 jylǵy tamyzdan 2018 jylǵy qyrkúıekke deıin – QR Premer-Mınıstri Keńsesiniń jobalyq basqarý ortalyǵynyń meńgerýshisi.
2018 jylǵy qyrkúıekten 2019 jylǵy naýryzǵa deıin QR Ulttyq ekonomıka vıtse-mınıstri.
2019 jylǵy naýryz-tamyz aralyǵynda QR Premer-Mınıstri Keńsesi Basshysynyń orynbasary retinde qyzmet atqardy.
2019 jylǵy tamyzdan 2021 jylǵy qańtarǵa deıin QR Ulttyq ekonomıka birinshi vıtse-mınıstri laýazymyna taǵaıyndaldy.
2021 jylǵy qańtardan 2022 jylǵy qańtarǵa deıin – QR Ulttyq ekonomıka mınıstri.
2022 jylǵy qańtardan 2023 jylǵy qyrkúıekke deıin – QR Strategııalyq josparlaý jáne reformalar agenttiginiń tóraǵasy.
2023 jylǵy 2 qyrkúıekte Memleket basshysynyń Jarlyǵymen Qazaqstan Respýblıkasy Prezıdentiniń ekonomıkalyq máseleler jónindegi kómekshisi bolyp taǵaıyndaldy.
