Áset Erǵalıev Eýropalyq odaqtyń kómirtek salyǵyna qatysty pikir bildirdi

NUR-SULTAN. QazAqparat – QR Ulttyq ekonomıka mınıstri Áset Erǵalıev 2023 jyldan bastap Eýropalyq odaq elderinde engiziletin kómirtek salyǵyna qatysty pikir bildirdi, dep habarlaıdy QazAqparat tilshisi.

«Eýropalyq odaq 2023 jyldan bastap kómirtek salyǵyn engizýdi josparlap otyr. Ol zııandy shyǵaryndylar deńgeıi óte joǵary óndiriske ımporttalatyn taýarlarǵa engiziletin bolady. Aıta keterligi, mundaı elder úshin 2026 jyldyń 1 qańtaryna deıin kóshpeli kezeń usyný múmkindigi de qarastyrylyp jatyr. Eger de qandaı da bir taýarlar jaıynda aıtar bolsaq, onda olar – munaı ónimderi, bolat, alıýmınıı, tsement, organıkalyq hımııa taýarlary. Kómirtek salyǵy qurylymyna qatysty Eýropalyq odaqta talqylaý júrip jatyr»,- dedi mınıstr Ortalyq kommýnıkatsııalar qyzmetindegi baspasóz máslıhatynda.

Osy rette ol atalǵan talqylaýlar barysyn tyńǵylyqty baqylap, saraptama júrgizip otyrǵandyqtaryn jáne Eýrazııalyq ekonomıkalyq odaqtaǵy seriktesterimizben keńes júrgizetindikterin atap ótti.

«Jalpy, esepteýler júrgizilip jatyr. Menińshe, osy jyldyń sońyna deıin kartına aıqyndalatyn bolady», - dedi Áset Erǵalıev.