Áset Erǵalıev ekonomıkany qoldaý úshin ne isteý keregin aıtty

NUR-SULTAN. QazAqparat – QR Ulttyq ekonomıka mınıstri Áset Erǵalıev el ekonomıkasyn qoldaý úshin ortalyq jáne jergilikti atqarýshy organdarǵa birqatar usynym berdi, dep habarlaıdy QazAqparat.

«Aýyl sharýashylyǵy kesheninde ónimniń josparlanǵan satý kólemderin jáne qurylys salasyndaǵy kezeńniń ýaqytynda bitirýin qamtamasyz etý kerek. Inflıatsııaǵa qarsy áreket etý jónindegi sharalar kesheniniń tıimdi júzege asyrylýyn qadaǵalaý qajet», - dedi Á. Erǵalıev Úkimettiń búgingi otyrysynda.

Mınıstrdiń aıtýynsha, halyqty vaktsınalaý jáne revaktsınalaý, kásipkerlikti qoldaýdyń memlekettik sharalaryn ýaqytynda usyný da mańyzdy.

«Memlekettik qoldaý sharalary sheńberinde qurylyp jatqan jumys oryndaryn dınamıkalyq monıtorıngtep, turaqty jumys oryndarynyń úlesin arttyrý kerek. Naqty sektordaǵy óndirýdiń joǵary kólemderin saqtaý jáne ónimniń eksportqa shyǵarylýyn belsendi túrde yntalandyrý qajet. Joǵaryda atalǵan sharalardy tıimdi iske asyrý elimizdiń ekonomıkasynyń ósýin jedeldetýge múmkindik beredi», - dedi Á. Erǵalıev.

Buǵan deıin Ulttyq ekonomıka mınıstri bıylǵy 10 aıdaǵy elimizdiń ekonomıkalyq damýyn baıandaǵan edi.