Áset Erǵalıev 2023 jyly el ekonomıkasy ósedi dep boljam jasady
«Ótken jylǵy jalpy ishki ónim boıynsha eseptik statıstıka derekteri jáne ekonomıka damýynyń osy jyldyń qańtar-shilde aılaryndaǵy qorytyndylary men Halyqaralyq qarjy uıymdarynyń álemdik ekonomıkanyń ósýi boıynsha jańartylǵan boljamdaryn eskere otyryp qalyptastyryldy. Kelesi jyly álemdik ekonomıka - 4,9 paıyzǵa, 2023 jyly 3,5 paıyzǵa ósedi dep kútilýde. Halyqaralyq qarjy uıymdarynyń konsensýs-boljamy boıynsha kelesi jyly munaıdyń baǵasy barreline 64,5 dollar, al 2023 jyly – 58 dollar deńgeıinde bolady», - dedi «Áleýmettik-ekonomıkalyq damý boljamy» jáne «Ulttyq qordan kepildendirilgen transfert týraly» zań jobasy týraly baıandaǵan mınıstr.
Onyń atap ótýinshe, boljam pandemııadan keıingi qalpyna keltirýdiń jahandyq úrdisterin eskere otyryp ázirlendi.
«Qazaqstannyń negizgi saýda áriptesteriniń ekonomıkasynyń belseldiligi baıqalyp otyr. Áleýmettik-ekonomıkalyq damýdyń boljamynda álemdik taýarlar naryǵyndaǵy baǵanyń qubylmalyǵy, halyqaralyq saýda jáne ınvestıtsııalyq trendter esepke alyndy. Osy jaǵdaılardy eskere otyryp, makroekonomıkalyq kórsetkishter boljamy konservatıvti tásilde qalyptasty. Bıýdjetti josparlaýǵa negiz retinde bazalyq stsenarıı alyndy. Oǵan sáıkes munaı baǵasy barreline 60 dollar dep boljanyp otyr. 2022 jyly jalpy ishki ónimniń naqty ósýi 3,9 paıyz deńgeıinde boljanýda. Bul kórsetkish 2026 jyly 5,2 paıyzǵa deıin jetedi. Bes jyl aralyǵynda jalpy ishki ónimniń ortasha jyldyq ósý qarqyny 4,8 paıyzdy quraıdy», - dedi Áset Erǵalıev.
