Ásemgúl Baltasheva HQO atyn jamylǵan alaıaqtardan saq bolýdy eskertti
«Máselen, Pavlodarda ózin HQO qyzmetkerimin dep tanystyrǵan bireýler azamattarǵa qońyraý shalyp, nesıe boryshyn ótemese, JSN nómirin buǵattaımyz dep qorqytqan. Alaıaqtar azamattardyń áleýmettik jelilerdegi paraqshalaryna jazyp, SMS jiberip, telefondaryna qońyraý shalyp mazalaǵan. Keıin aqsha aýdarylýy tıis bank kartasynyń nómirin aıtyp otyrǵan. Al negizinde memlekettik korporatsııanyń qyzmetkerleri azamattarǵa qońyraý shalmaıdy. Olarda JSN buǵattaıtyn quzyreti joq», – dep eskertti Ásemgúl Baltasheva QR Sybaılas jemqorlyqqa qarsy is-qımyl agenttiginde ótken brıfıng barysynda.
Qaraǵandylyq taǵy bir turǵyn alaıaqtyqtyń qurbany bola jazdaǵan. Oǵan «HQO qyzmetkerimin» dep qońyraý shalǵan adam Nur-Sultan qalasyndaǵy páter boıynsha kezeginiń jaqyndaǵanyn habarlaǵan. Sózderi dáleldi bolý úshin alaıaq tipten jalǵan qujattyń sýretin de jibergen. Degenmen, «páterge ıe bolý úshin qaryzyńyzdy óteńiz» dep talap etken. Biraq taǵy da qandaı nesıeni jabý kerektigin naqtylamaǵan.
«Memlekettik korporatsııada qujatta kórsetilgen turǵyn úı baǵdarlamasy týraly esh málimet joq jáne ol týraly halyqty qulaǵdar etpeımiz. Bul – alaıaqtyqtyń taǵy bir shemasy dep oılaımyz, olar tek sengish azamattardyń aqshasyn kez kelgen jolmen tartyp alýdy kózdeıdi», – deıdi basqarma tóraıymy.
Ásemgúl Baltasheva qazaqstandyqtarǵa qyraǵylyq tanytýǵa, jalǵan aqparatqa senbeýge jáne mundaı jaǵdaılar kezdesken jaǵdaıda, quqyq qorǵaý organdaryna habarlaý qajettigin eskertti.
