Ásem Orynbaı Dohadaǵy Álem Kýbogynda jeńimpaz atandy
Ásem Orynbaı Qatar memleketiniń astanasy Dohada ótip jatqan nysana kózdeýden Álem Kýbogynyń fınalynda altyn medal jeńip aldy, dep habarlaıdy Kazinform QR Týrızm jáne sport mınıstrligi Sportty damytý dırektsııasynyń baspasóz qyzmeti.
Ulttyq qurama sportshysy stend atýdyń skıt baǵdarlamasynda aqtyq synǵa shyǵyp, 51 ball jınady. Kıara Dı Martsıantonıo (Italııa) 50 nysana dál kózdep kúmis júldege ıe bolsa, qola medal Danııa Djo Vıtstsıdiń (AQSh) enshisinde. Bul synda 3 dúrkin Olımpıada chempıony Kımberlı Roýd (AQSh) júldege bir taban jetpeı toqtady (34 upaı).
Aıta keteıik, keshe Ásem alǵashqy irikteýden keıin 72 upaımen kósh basyna shyqqan, al búgin 44 ball alyp, fınalǵa 6-orynmen (116 upaı) joldama aldy. Qazaq mergeni qazir ISSF reıtınginde 7-orynda kele jatyr.
«Óte baqyttymyn. Búgin kún raıy qolaıly boldy dep aıta almaımyn. Sát saıyn jel turyp, «tosynsyı» jasap jatty. Soǵan qaramastan úzdik shyqtym. Bul osy maýsymdaǵy sońǵy jarys. Bar oıym laıyqty óner kórsetý boldy»,-dedi Ásem Orynbaı fınaldan keıin Halyqaralyq nysana kózdeý federatsııasynyń baspasóz qyzmetine bergen suhbatynda.
Bıylǵy maýsymda Ásem Orynbaı ár jarysta turaqty óner kórsetip, birneshe ret tuǵyr bıigine kóterildi.
Atap aıtar bolsaq, mamyrda Almatyda ótken reıtıngtik Álem Kýbogynda jekeleı synda top jaryp, izin ala áriptesi Edýard Eşenkomen birlesip kúmis júldeger atandy. Sosyn, jazda Lonatodaǵy (Italııa) Álem Kýbogynda aralas juptar arasynda (Edýard Eşenkomen) 3-oryn alǵan.
Halyqaralyq nysana kózdeý federatsııasy (ISSF) mundaı fınaldy araǵa 4 jyl salyp uıymdastyryp otyr. Básekede 42 elden kelgen 179 úzdik mergen baq synap jatyr.
