«AselorMıttal Temirtaý» kompanııasy aglomashınany qaıta qalpyna keltirýge úsh mlrd. teńge ınvestıtsııalady
ASTANA. QazAqparat - «AselorMıttal Temirtaý» metallýrgııalyq kombınatynda 25-shi maýsymda kúrdeli jóndeý jáne qaıta qalpyna keltirýden soń №6 aglomeratsııalyq mashına iske qosyldy. Kompanııa bul jobaǵa shamamen 3 mlrd. teńge qarjy saldy, dep habarlaıdy Qaraǵandy oblysy ákimdiginiń baspasóz qyzmeti.
Jóndeý jáne qaıta qalpyna keltirý jumystary óte qysqa merzimde - 75 táýlik ishinde jasaldy. Jumysqa 400-den astam adam jumyldyrylǵan.
Qaıta qalpyna keltirý jáne jóndeý jumystarynan soń agregattyń salystyrmaly ónimdiligi 30%-ǵa ulǵaıady, deıdi «AselorMıttal Temirtaý» baspasóz qyzmeti. Sonymen qatar qalpyna keltirý jumystary ekologııalyq jaǵdaıǵa oń áser etip, kompanııa qyzmetkerleriniń eńbek sharttaryn jaqsartýǵa septigin tıgizedi.
Osymen ekinshi jyl qatarynan kompanııa aglo óndiristi jańǵyrtýda. Ótken jyly №7 aglomashına kúrdeli jóndeýden ótken bolatyn. Aǵymdaǵy jyldyń maýsym aıynda №6 aglomashınany qaıta qalpyna keltirý jumystary aıaqtaldy. Kelesi jyly №5 aglomashınany jóndep, jańartý jáne barlyq aglomashınalardyń artyndaǵy jentektelý aýmaǵynda jańa gaz tazartqysh salý josparlanyp otyr.
- Metallýrgııalyq kombınat josparly túrde óndiris kólemin ulǵaıtyp keledi, - deıdi «AselorMıttal Temirtaý» AQ atqarýshy dırektory Vadım Basın. - Aglomeratshylardyń basty maqsaty kólemi men óndiristik qýaty ulǵaıtylǵan jańǵyrtylǵan domna peshterimizdi aglomeratpen qamtamasyz etý bolyp tabylady. Kompanııa aglomeratsııalyq óndiristegi barlyq aglomashınalardy qaıta jóndeýdi josparlap otyr. Olardy jańartýǵa biz 7 mıllıardtan astam qarjy ınvestıtsııalaımyz.
