Ásel Janasova jańa qyzmetke taǵaıyndaldy

ASTANA. KAZINFORM – Aqorda Ásel Janasovanyń jańa qyzmetke taǵaıyndalǵanyn habarlady.

— Memleket basshysynyń Jarlyǵymen Ásel Jubanyshqyzy Janasova Qazaqstan Respýblıkasy Prezıdentiniń Ákimshiligi Basshysynyń orynbasary bolyp taǵaıyndaldy, ol burynǵy atqarǵan laýazymynan bosatyldy, — delingen resmı qujatta.

Eske salaıyq, ol bıylǵy maýsym aıynan beri QR Prezıdentiniń keńesshisi qyzmetin atqaryp kelgen.

Aıta keteıik, Ásel Janasova 1987 jyly Almaty qalasynda týǵan. Kembrıdj ýnıversıtetin bitirgen.

Eńbek jolyn 2010 jyly «ENRC Kazakhstan» óndiristi avtomattandyrý jáne baılanys departamentiniń aqparattyq tehnologııalar jónindegi mamany bolyp bastady.

2016-2017 jyldary — «Zerde» UBH» AQ basqarma tóraıymy.

2018-2020 jyldary — «Astana» halyqaralyq qarjy ortalyǵynyń tsıfrlyq tehnologııalar jónindegi basqarýshy dırektory.

2020-2022 jyldary QR saýda jáne ıntegratsııa vıtse-mınıstri boldy.

2022-2025 jyldar «Qazposhta» AQ basqarma tóraǵasy laýazymyn atqardy.