Ásel Janasova Kólik mınıstri bolyp taǵaıyndaldy
ASTANA. KAZINFORM — Prezıdent tıisti jarlyqqa qol qoıdy, dep habarlaıdy Aqordanyń baspasóz qyzmeti.
— Memleket basshysynyń Jarlyǵymen Ásel Jubanyshqyzy Janasova Qazaqstan Respýblıkasy Premer-Mınıstriniń orynbasary — Kólik mınıstri bolyp taǵaıyndaldy, ol burynǵy atqarǵan laýazymynan bosatyldy, — delingen habarlamada.
Ásel Jubanyshqyzy Janasova 1987 jyly Almaty qalasynda dúnıege kelgen.
2010 jyly «Bolashaq» halyqaralyq baǵdarlamasy boıynsha Kembrıdj ýnıversıtetinde (kompıýterlik ǵylymdar salasy) bilim alǵan. 2014 jyly Kembrıdj ýnıversıtetinde magıstratýrany támamdaǵan. Máskeý memlekettik ýnıversıtetinde «Executive Management» baǵdarlamasy boıynsha oqyǵan.
2010-2014 jyldary – London qalasyndaǵy halyqaralyq kompanııanyń aqparattyq tehnologııalar jónindegi mamany, Aqparattyq tehnologııalar basqarmasynyń menedjeri, Kıberqaýipsizdik departamentiniń dırektory;
2014-2016 jyldary Qazaqstan Respýblıkasy Ulttyq bankiniń Tsıfrlyq tehnologııalar departamenti dırektorynyń orynbasary;
2016-2017 jyldary – «Zerde ulttyq basqarýshy holdıngi» aktsıonerlik qoǵamynyń basqarma tóraǵasy;
2017-2018 jyldary – «Astana» halyqaralyq qarjy ortalyǵy basqarýshysynyń keńesshisi;
2018-2020 jyldary – «Astana» halyqaralyq qarjy ortalyǵynyń tsıfrlyq tehnologııalar jónindegi basqarýshy dırektory;
2020-2022 jyldary – Qazaqstan Respýblıkasy Saýda jáne ıntegratsııa mınıstriniń orynbasary;
2022-2025 jyldary – «Qazposhta» aktsıonerlik qoǵamynyń basqarma tóraǵasy;
2025 jylǵy 8 maýsymda Qazaqstan Respýblıkasy Prezıdentiniń keńesshisi bolyp taǵaıyndaldy.
2025 jylǵy 10 jeltoqsanda Memleket basshysynyń Jarlyǵymen Qazaqstan Respýblıkasy Prezıdentiniń Ákimshiligi Basshysynyń orynbasary bolyp taǵaıyndaldy.
«Qazaqstan Respýblıkasynyń Táýelsizdigine 30 jyl» mereıtoılyq medalimen (2021) jáne «Qurmet» ordenimen (2025) marapattalǵan.
Dúnıejúzilik ekonomıkalyq forýmnyń (WEF) Young Global Leader 2025 qaýymdastyǵynyń, Global Women Asia Fellow 2024 halyqaralyq kóshbasshylyq baǵdarlamasynyń múshesi.
Buǵan deıin Nurlan Saýranbaev Kólik mınıstri laýazymynan bosatylǵanyn jazǵanbyz.
