Ásel Rymxanovanyń ákesi: Jalǵyz qyzym múgedek bolyp qaldy

Aıta keteıik, ótken jyly 12 qarashada «Infiniti» kóligin mingen statıstıka komıtetiniń qyzmetkeri Bolat Moldaǵalıev eki adamdy qaǵyp ketti. 25 jastaǵy bir qyz qatty zardap shekken joq. Aýrýxanada ony kóp ustamaı, úıge jiberdi. Al 24 jastaǵy Ásel Rymxanovanyń birneshe jeri syndy. Mıy shaıqalyp, aýyr jaraqat aldy. Birneshe kúnnen keıin Áselge ota jasaldy. Dárigerler qyzdyń kókbaýyryn alyp tastaýǵa májbúr boldy. Kólik júrgizýshisi Bolat Moldaǵalıev ashyq xat jarııalap, Áseldiń týysqandarynan keshirim surady. Ol oqıǵa ornynda epılepsııa ustap qaldy dep aqtaldy. Sol sebepti Áselge kómek bere almady. Alaıda Áseldiń týǵan-týystary oǵan senbeıdi. Sebebi epılepsııamen aýratyn adamǵa júrgizýshi kýáligi berilmeýi kerek.
 

«Qazirgi kezde prokýrorlar ony Qylmystyq kodekstiń 345-baby, 2-tarmaǵy (abaısyzda adam densaýlyǵyna aýyr zııan keltirý) jáne 347-baby (jol-kólik oqıǵasy bolǵan jerden ketip qalý) boıynsha kináli dep sanaıdy. Alaıda Moldaǵalıev tek 345-bapty ǵana moıyndap otyr. Biraq «oqıǵa ornynan ketpedim, qoıanshyǵym ustap qaldy» deıdi. Alaıda epılepsııanyń oǵan eshbir qatysy joq. Ondaı adamdarǵa rýlge múldem otyrýǵa bolmaıdy. 2000 jyldan beri ol kólik kýáligin úsh ret aýystyrdy. Al osy qujatty alý úshin medıtsınalyq tekseristerden ótý kerek qoı. Barlyq qaǵazdarda «densaýlyǵy jaqsy» dep jazylǵan. Epılepsııamen aýyratyn adam retinde esh jerde tirkelmegen. Zań boıynsha ondaı adamdarǵa júrgizýshi kýáligin berýge tyıym salynǵan», - deıdi Rymxanovtardyń advokaty Kúlbadan Shákirova.
 

Búgingi otyrysta Áseldiń ákesi - Nurlan Rymxanov qyzynyń densaýlyǵy týraly aıtyp berdi. «Qazir bir-eki balasy bar otbasylar bar. Bul - bizdiń jalǵyz qyzymyz...Biz onyń dúnıege kelgenin asyǵa kúttik, bolashaǵyna úlken úmitpen qaradyq...Myna jaqtan kelip, bireýi ony múgedek qylǵanda óte aýyr eken, sózben jetkizý múmkin emes...Men bul istiń ádil, zań boıynsha qaralǵanyn qaraımyn. Biz odan aıyrylyp qala jazdadyq. Endi, ol ómirbaqı múgedek bolyp qalady», - dep atap kórsetti N.Rymxanov. Onyń aıtýynsha, bir aıdyń ishinde Áselge bes ota jasaldy. Eki buǵanasyna da plastına qoıyldy. Jambasy úsh-tórt jerden syndy. Kókbaýyryn alyp tastady. Endi, tizesine ota jasaý qajet. Qazirgi kezde Ásel úıde em alyp júr.
 

Otyrys kezinde Áseldiń advokaty qylmystyq isti adam óltirýge oqtalý (24-baby, 3-tarmaǵy) jazasyna aýystyrýdy surady. Al aıyptalýshy Bolat Moldaǵalıev onyń densaýlyǵyna qatysty saraptamany qaıta ótkizýge ótinish jasady. Sebebi sońǵy saraptama onyń jol-kólik apaty kezinde epılepsııaǵa dýshar bolǵanyn rastamady. Alaıda sýdıa Qanat Dúısembıev eki jaqtyń da ótinishin keri qaıtardy. Atalǵan qylmystyq iske qatysty negizgi sot otyrysy 16 aqpanda ótedi.