Ásel Qanaı men Sofıa Berýltseva Premer-lıga týrnıriniń fınalyna shyqty

ASTANA. KAZINFORM - Italııa astanasy Rımde ótip jatqan Premer-lıga sanatyndaǵy jyldyń ekinshi týrnırinde Ulttyq quramanyń 2 sportshysy aqtyq synǵa joldama aldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.

Ásel Qanaı -61 kg salmaqtyń shırek fınalynda Barbara Hýaıkımandy (Chılı), jartylaı fınalda Vafa Mahjýbty (Týnıs) utty.

Endi erteń fınalda otandasymyz Japonııa ókili Sarara Shımadamen bas júldege talasady.

Al Sofıa Berýltseva jartylaı fınalda Marııa Garsııa Torresti (Ispanııa) jeńip, bıyl qatarynan 2-shi Premer-lıga týrnıriniń fınalyna shyqty. Berýltseva osyǵan deıin shırek fınalda Túrkııa ókilin jeńgen.

Erteń Tokıo Olımpıadasynyń qola júldegeri fınalda Roshel Ýolterspen (Anglııa) sarapqa salady. Ekeýi byltyr Kaırdegi álem chempıonatynyń jartylaı fınalynda jolyǵyp, Sofıa jeńisti julyp alǵan.

Sonymen qatar shırek fınalda -84 kg salmaqtaǵy Ulttyq qurama sportshysy Nıkıta Tarnakın Edýard Gasparskııge (WKF-1) jol berdi. Al +84 kg salmaqtaǵy Dıas Anarbekov Bosnııa jáne Gertsegovına sportshysy Anes Bostandjıchten jeńilip qaldy.

Aıta keteıik, Premer-lıga básekesine álem reıtınginde úzdikter iriktelip qatysady.

Italııada bul kúnderi kata jáne kýmıte baǵdarlamasynda 66 memleketten 384 atlet kúsh synasyp jatyr.

Qazaqstan osyǵan deıin Ystanbulda ótken Premer-lıga týrnırinde 2 altyn medalmen jalpykomandalyq esepte 3-oryn alǵan.

Aıta keteıik, Taıland astanasy Bangkok qalasynda ótip jatqan Futures Cup halyqaralyq týrnırinde el quramasynan Aıdana Ýbaıdýllaqyzy (80 keli) chempıon atandy.