Ásel Dálıevaǵa QR Eńbegi sińgen jattyqtyrýshysy ataǵy berildi
NUR-SULTAN. QazAqparat - Esimi toǵyzqumalaq tarıhynda altyn áriptermen jazylǵan, «100 jańa esim» jobasynyń jeńimpazy, álemniń 9 dúrkin chempıony Ásel Dálıevaǵa QR Eńbegi sińgen jattyqtyrýshysy ataǵy berildi, dep habarlaıdy QazAqparat tilshisi.
Ásel Qazaqstan boıynsha eresekter arasyndaǵy respýblıkalyq chempıonatty jeńip, eń jas sport sheberi ataǵyna 12 jasynda ıe boldy jáne 16 jasynda eń jas Halyqaralyq dárejedegi sport sheberi normatıvin oryndady. Qazaqstannyń 20 jasqa deıingi jastar arasyndaǵy chempıonattarynyń 6 dúrkin jeńimpazy, Qazaqstannyń eresekter arasyndaǵy saıystarynda 13 dúrkin chempıony, sonymen qatar 3 dúrkin Azııa chempıony atansa, 9 dúrkin toǵyzqumalaqtan álem chempıony atanǵan jalǵyz sportshy.
Budan basqa da kóptegen shetelderde ótken (Praga, Pardýbıtsı, Lıatýrdepe, Kann, Antıgýa jane Barbýda, Antalıa, Ystanbul, Bishkek, Tashkent, Orynbor) halyqaralyq jarystardyń jeńimpazy.
«Toǵyzqumalaqta shákirtiń álem chempıonatynda jeńis tuǵyrynyń eń bıik satysynan kórinse, Qazaqstan Respýblıkasyna eńbegi sińgen jattyqtyrýshysy ataǵy beriledi. Meniń tól oıynymyz toǵyzqumalaqtan jattyqtyryp júrgen oqýshym Lına Karımova osy jyly sáýir aıynda Túrkııada ótken álem birinshiliginde ekinshi márte top jardy. Mine, osy jetistigimizdi eskergen QR MSM Sport jáne dene shynyqtyrý isteri komıtetiniń tóraǵasy Serik Sápıev maǵan «QR Eńbegi sińgen jattyqtyrýshysy ataǵyn» berdi. Alda, biz baǵyndyratyn bıik belester kóp. Tól oıynymyzdy tórtkil dúnıege tanytýǵa bar kúsh-jigerimizdi salamyz», - dep aǵynan jaryldy Ásel Dálıeva QazAqparat tilshisine.
Aıta keteıik, Ásel Dálıeva búgingi tańda Túrkistan oblystyq Ulttyq sport mektebinde toǵyzqumalaq oıynynan jattyqtyrýshy bolyp qyzmet etedi.
