Asaıyn Baıhanov Ekibastuz jylý jelilerin jóndeý qarqynyn báseńdetpeýdi tapsyrdy

PAVLODAR. QazAqparat - Pavlodar oblysynyń ákimi Asaıyn Baıhanov jumys saparymen Ekibastuzǵa bardy. Ol №7 mektepte bolyp, jylý jelilerindegi jóndeý jumystarynyń barysyn tekserdi, jedel shtab otyrysyn ótkizdi, dep habarlaıdy QazAqparat tilshisi.

«Jylýmen qamtý jelileride parametrlerdiń tómendeýinen jylýsyz qalǵan kóptegen mekemeniń ishinde №7 mektep te boldy. Jaǵdaıdy jaqsartý úshin qańtar aıynyń ortasynda M. Júsip pen Kenshiler kóshelerindegi jelilerge jóndeý júrgizildi. Jumys qorytyndysy boıynsha jylýmen qamtý jelilerinde jaǵdaı aıtarlyqtaı jaqsardy»,- dep habarlady oblys ákimdiginiń baspasóz qyzmeti.

Jylý 59-dan 65-75 gradýsqa deıin, al mekteptegi temperatýra 17-19 gradýstan 18-23 gradýsqa deıin kóterildi. Asaıyn Baıhanov jóndeý jumystarynyń qarqynyn báseńdetpeı, áleýmettik nysandarǵa basa nazar aýdarýdy tapsyrdy.

Aımaq basshysy Kenshiler, Molodejnaıa jáne Grıdına kóshelerindegi jylý jelilerin jóndeý jáne qalpyna keltirý jumystary júrgizilip jatqan ýchaskelerin aralap kórdi.

«Búginde Ekibastuzda jylý jelilerindegi 130-dan astam aqaý joıyldy, 23-inde jumys júrgizilip jatyr. Jóndeý jumystary táýlik boıy júrgizilýde. Zaqymdaný oryndarynda kenshiler qalasynyń kommýnaldyq qyzmetterinen bólek oblys ortalyǵynyń jedel toptary da jumys istep jatyr», - dep atap ótti ákimdikte.

Qalany aralap shyqqan aımaq basshysy jedel shtabtyń otyrysyn ótkizdi. Asaıyn Baıhanov jóndeý jumystary aıaqtalǵan aýmaqtardy qalpyna keltirý qajettigin atap ótti. Oblys ákimi qala turǵyndarynyń qaýipsizdigin qamtamasyz etip, qańtar aıynyń sońyna deıin jóndelgen aýmaqtardyń 80 paıyzyn qalpyna keltirýdi tapsyrdy. Kommýnaldyq qyzmetterge qoıylatyn talaptar oryndalmaǵan jaǵdaıda ákimshilik sharalar qoldanylatyny eskertildi.