Pavlodar oblysynyń ákimi Jalaýly aýylynda búlingen úılerdiń ıelerimen kezdesti
PAVLODAR. KAZINFORM – Pavlodar oblysynda Memleket basshysy Qasym-Jomart Toqaevtyń tapsyrmasy boıynsha óńirde sý tasqynynan zardap shekkenderge jan-jaqty qoldaý kórsetilýde jáne jedel túrde keltirilgen zalal ótelýde.
Búgingi tańda sý tasqyny kezinde múlkine ártúrli dárejede zııan kelgen 107 otbasyǵa bıýdjetten tys demeýshilik qarajat esebinen jalpy somasy 96,7 mln teńge kóleminde ótemaqy berildi. Sonyń ishinde ótemaqyny búgin sý tasqyny kezinde úıleri qatty zaqymdanǵan Jalaýly aýylynyń 9 turǵyny aldy.
Sondaı-aq, Asaıyn Baıhanov pen aýyl aqsaqaldary táýelsiz komıssııanyń sheshimi boıynsha qalpyna keltirýge kelmeıtin avarııalyq jaǵdaıdaǵy úılerdiń ornyna salynatyn 5 jańa úıdiń qurylysyna bastaý berdi. Shyǵyndardy ERG toby óz moınyna aldy. Úılerdiń qurylysyn 3 aıdyń ishinde aıaqtaý josparlanýda.
Sonymen qatar, zardap shekken oblys turǵyndaryna 100 AEK mólsherinde birjolǵy memlekettik áleýmettik tólem tólenetin bolady.
Osymen aýylda sý tasqynyna qarsy is-sharalar aıaqtalmaıdy. Shilde aıynyń sońyna deıin aýylda 6 km qorǵanys bógeti salynyp, oıpań jerde ornalasqan aýyldyń máselesin keshendi túrde sheshý úshin kólemi 200 myń m3 bolatyn erigen sýlardy jınaýǵa arnalǵan 3 qazanshuńqyr jasalady.
