Asaıyn Baıhanov: Balalarym da, jaqyn týystarym da memlekettik qyzmette joq

Pavlodar oblysynyń ákimi Asaıyn Baıhanov balalary men jaqyn týǵandary arasynda memlekettik qyzmetshiler joq ekenin aıtty, dep habarlaıdy Kazinform.

«Bir jyly bul vıdeony bireýler jiberdi, kórdim. Ol meniń qyzym emes, kimniń qyzy ekenin bilmeımin. Meniń 4 balam bar, ekeýi mektep jasynda, ekeýi eresek. Ekeýi de ýnıversıtet bitirdi. Memlekettik te, kvazımemlekettik te emes, jeke sektorda jumys isteıdi. Almatyda turady. Qyzym turmysqa shyqqan. Olar bıýdjettik te, memlekettik te uıymdarda esh ýaqytta jumys istegen joq», - dedi óńir ákimi Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Sonymen qatar Asaıyn Baıhanov eń jaqyn týǵan-týystarynyń da ne memlekettik, ne kvazımemlekettik sektorda jumys istemeıtinin basa aıtty.

«Olardyń barlyǵy jeke sektorda jumys isteıdi. Eki ápkem, bir aǵam bar. Ákem men sheshem zeınetker», - dedi ol.