Asat Nurpeıisov Prezıdenttiń Іs basqarýshysy bolyp taǵaıyndaldy

ASTANA. KAZINFORM — Asat Bolatuly Nurpeıisov Qazaqstan Respýblıkasy Prezıdentiniń Іs basqarýshysy bolyp bekitildi.

«Memleket basshysynyń Jarlyǵymen Asat Bolatuly Nurpeıisov Qazaqstan Respýblıkasy Prezıdentiniń Іs basqarýshysy bolyp taǵaıyndaldy, ol burynǵy atqarǵan laýazymynan bosatyldy», — dep jazdy Aqordanyń resmı saıty. 

Aıta keteıik, Asat Bolatuly 1987 jyly 18 shildede dúnıege kelgen.

2010 jyly Pragadaǵy Nıý-Iork ýnıversıtetin «ekonomıka jáne menedjment» mamandyǵy boıynsha, 2012 jyly Eýropalyq bıznes mektebin bitirgen, MSc Global Banking and Finance «Halyqaralyq bank isi jáne qarjy» magıstri.

Prezıdenttik jastar kadrlyq rezerviniń múshesi.

2012-2015 jyldary KPMG Tax and Advisory menedjment konsaltınginde jumys istegen.

2015-2016 jyldary – Memlekettik basqarý júıesin damytý departamentiniń basqarma basshysy, Qazaqstan Respýblıkasy Ulttyq ekonomıka mınıstriniń keńesshisi.

2016-2017 jyldary – «Báıterek» UBH» AQ Korporatıvtik qarjy departamentiniń dırektory.

2018-2019 jyldary – Qazaqstan Respýblıkasy Premer-Mınıstri Keńsesi Jobalyq basqarý ortalyǵynyń bas ınspektory, meńgerýshiniń orynbasary, meńgerýshiniń mindetin atqarýshy.

2019-2022 jyldary – Qazaqstan Respýblıkasy Ulttyq Banki Tóraǵasy apparatynyń basshysy.

2022 jylǵy 16 aqpannan bastap Almaty qalasy ákimi apparatynyń basshysy qyzmetin atqardy.

2023 jylǵy 5 qańtarda Qazaqstan Respýblıkasy Prezıdenti Іs basqarýshysynyń orynbasary laýzymyna taǵaıyndaldy.