«Asar-Úme» qorynyń prezıdenti Perızat Qaıratqa 200 mln teńge aýdarǵanyn aıtty
ASTANA. KAZINFORM — Astana qalasyndaǵy qylmystyq ister jónindegi aýdanaralyq sotynda Perızat Qaıratqa qatysty qylmystyq is qaralyp jatyr.

Búgin qylmystyq istiń ekinshi epızodyn zertteý bastaldy. Sot otyrysynda jábirlenýshi taraptyń ókili retinde «Asar-Úme» qorynyń prezıdenti Ashat Nurmashev sóıledi. Ol Perızat Qaırat jetekshilik etken qorǵa 200 mıllıon teńge aýdarylǵany týraly aıtty.
Onyń aıtýynsha, 2023 jyldyń qarasha aıynda Izraıl men Gaza sektory arasyndaǵy qaqtyǵystyń ýshyǵýyna baılanysty buqaralyq aqparat quraldary men áleýmettik jelilerde Perızat Qaırattyń Qazaqstandaǵy Palestına elshiliginiń qoldaýymen zardap shekken turǵyndarǵa kómek jınaý naýqanyn bastaǵany týraly aqparat taraǵan. Ashat Nurmashevtiń sózinshe, Perızat Qaırattyń Palestına elshiligimen memorandýmy bolǵan, bul onyń senimin týdyrǵan.
— Men Perızatpen jeke kezdestim, onyń josparyna kóz jetkizgim keldi. Belgili bolǵandaı, onyń Qazaqstandaǵy Palestına elshiligimen kelisiminen bólek, BAÁ-de Gaza sektoryna kómek uıymdastyratyn qorlarmen de baılanysy bolǵan. Tipti Abý-Dabıdegi gýmanıtarlyq júk jiberiletin habpen baılanysy bar ekeni aıtyldy, — dedi sotta Ashat Nurmashev.
Bes kún ishinde «Asar-Úme» qorynyń ókilderi 293 mıllıon teńge jınaǵan. Bastapqyda kómek qarajatyn 50 mıllıon teńgeden birneshe transhpen jiberý josparlanǵan. Alaıda, Ashat Nurmashevtiń aıtýynsha, Perızat Qaırat barlyq somany bir aýdarymmen jiberýdi talap etken. Nátıjesinde 200 mıllıon teńgeni aýdarý týraly sheshim qabyldanǵan, qalǵan 93 mıllıon teńge keıin jiberilýi tıis bolǵan.
Qarajat 2023 jylǵy 28 qarashada aýdarylǵan. Kelisimshartqa sáıkes, Perızat Qaırat jeltoqsan aıynda qarajattyń «Abý-Dabı qory» arqyly aýdarylǵany jáne Gaza sektory turǵyndaryna qajetti taýardyń satyp alynǵany jóninde esep berýi tıis edi. Alaıda, qor prezıdentiniń aıtýynsha, ýáde etilgen esep berilmegen.
Sońynda qalǵan 93 mıllıon teńgeni tikeleı Qazaqstandaǵy Palestına elshiligi arqyly aýdarý týraly sheshim qabyldanǵan. «Asar-Úme» qorynyń ókilderi elshilikpen baılanysqa shyǵyp, qarajatty solar arqyly aýdarǵan. Ashat Nurmashevtiń aıtýynsha, elshilik qarajattyń naqty alýshylarǵa jiberilgenin rastaıtyn barlyq qujatty usynǵan.
Aıta keteıik, keshe sot otyrysynda belgili bolǵandaı, Biz birgemiz qorynyń quryltaıshylary qordy qurý týraly hattamaǵa qol qoımaǵandaryn málim etti.
Sondaı-aq memlekettik aıyptaýshy Perızat Qaırat pen onyń anasyna taǵylǵan aıyptardy tizbektep shyqty.
Sýdıa suraǵyna jaýap bergen Perızat Qaırat aıyptar negizsiz taǵyldy dep, moıyndamaıtynyn jetkizdi.