Asanov Sot tóreligi akademııasyna túsýshilerge: Komıssııa jumysynyń ádildigine kepildik beremin
«Sýdıa - abyroıly laýazym. Kez-kelgen zańgerdiń eń bıik shyńy. Bul jaı ǵana qabilet emes, sonymen qatar aıryqsha bedel, árbir sheshim úshin jaýaptylyqty, ádilettilik pen zańdylyqty joǵary deńgeıde sezine bilý. Oıshyldar sýdıany «sóıleıtin zań» dep jaıdan-jaı aıtpasa kerek. Bizdiń qoǵamda sýdıalar - bıler soty dástúrin jalǵastyrýshylar. Olar ar-ojdannyń, ádildiktiń, sheshendik ónerdiń, tereń bilim men basqa da qasıetterdiń etalonyna aınaldy. Uly dalanyń myzǵymas abyroıy men senimine ıe boldy. Qazaq handyǵynyń órkendeý dáýiri Áıteke, Qazybek jáne Tóle bılerdiń esimderimen baılanysty bolýy teginnen-tegin emes», - deıdi Asanov óz úndeýinde.
Onyń aıtýynsha, búgin de Memleket basshysynyń tapsyrmasymen respýblıkada sot júıesin jańǵyrtý júrgizilýde. Onyń eń mańyzdy mindetteriniń biri - sýdıalardy irikteý júıesin jolǵa qoıý. Sýdıalyq qyzmetke eń laıyqtylar men daıyndyǵy myqty úmitkerler ǵana kelýi tıis. Ol úshin kúrdeli, eń bastysy, ashyq konkýrs qajet. Joǵarǵy Sottyń birinshi basym baǵdarlamasynyń «MІNSІZ SÝDЬıA» dep atalýy da sondyqtan.
«Biz sýdıalardy irikteý men olardyń kareralyq ósý júıesin jetildirýdiń keshendi sharalaryn pysyqtaýdamyz. Bul jumys Joǵary Sot Keńesimen birge júrgizilýde. Osy oraıda sot bilimine erekshe nazar aýdarylyp otyr. Bul - sot bıligin jaqsartý men jańa zamanǵy sýdıalardy daıarlaýdyń sheshýshi faktory. Osy mindetti Joǵarǵy Sot janyndaǵy Sot tóreligi akademııasy tolyǵymen oryndap keledi. Akademııa sheteldik ozyq tájirıbe negizinde qurylǵan. Búgingi kúni ol - oqytý baǵdarlamasy sot júıesiniń naqty suranystaryn eskeretin elimizdegi jalǵyz joǵary oqý orny», - deıdi Joǵarǵy sot tóraǵasy.
Sot tóreligi akademııasynyń túlekteri basqalarǵa qaraǵanda birqatar artyqshylyqtarǵa ıe. Onyń sebebin Jaqyp Asanov bylaısha atap ótedi.
«Birinshisi. Bolashaq sýdıalardy Joǵarǵy Sottyń sýdıalary men jetekshi sarapshylar oqytady. Oqý barysynda sýdıalardyń kúndelikti jumysyndaǵy mysaldar keńinen qoldanylady. Sheteldik, sonyń ishinde úzdik quqyq mektepterindegi tájirıbege erekshe nazar aýdarylady. Ekinshisi - praktıkalyq mashyq: oqytý merziminiń 60%-y sot organdarynda tájirıbeden ótýge arnalǵan. Úshinshisi - shynshyldyq, adaldyq, beıtaraptylyq sııaqty jeke qasıetterdi damytý. Ózin-ózi jetildire bilý. Tulǵalyq damý boıynsha úzdik baǵdarlamalardy qoldaný. Akademııada buǵan asa mán beriledi», - deıdi ol.
Úndeýde aıtylǵandaı, irikteý sapasyn arttyrý maqsatynda magıstranttardy qabyldaý tártibi ózgertilgen.
«Emtıhannyń biri - quqyq salalary boıynsha naqty keısterdi sheshý. Budan keıin esse jazylady. Úmitker ózi jaıly, óziniń eńbek joly jáne ne úshin Akademııa magıstranty bolǵysy keletini týraly áńgimelep berýi tıis. Qajetti upaı jınaǵan árbir úmitkerdiń kásibı qasıetterin anyqtaý úshin ózim jáne Joǵary Sottyń basqa da ókilderi olarmen áńgimelesý ótkizemiz. Akademııany qarjylandyrý erejesine sáıkes úmitkerler memlekettik qyzmetshi bolýy tıis ekendigin birden atap ótkim keledi. Oqý kezinde olardyń eńbek ótili men jalaqysy saqtalady. Sonymen qatar sýdıalyqqa úmitkerlerdiń zańgerlik jumys ótiline qatysty qoıylatyn zań talaptary bar», - deıdi Joǵarǵy sot tóraǵasy.
Asanov jigerli, aldyna maqsat qoıa biletin jáne óz ómirin zań men qoǵamǵa qyzmet etýge arnaıtyn adamdardy Sot tóreligi akademııasynyń magıstratýrasyna shaqyrdy. Bul oqý ornynda sýdıa bolý úshin nıet bildirýshiler qajetti bilim men qabiletke ıe bolady.
«Qabyldaý barynsha obektıvti túrde ótedi. Men komıssııanyń jumysy ashyq, ádil bolatynyna kepildik beremin. Akademııaǵa eń laıyqtylar ǵana túsedi. Biz Qazaqstannyń sottarynda úzdikterdiń úzdigi jumys jasaǵanyn qalaımyz! Solardyń biri bolyńyz! Elimizdiń damýyna óz úlesińizdi qosyńyz! Sizdi kútemiz!», - deıdi Jaqyp Asanov.
