Asanov prokýrorlardy Májilis depýtattarymen salystyrdy
«Bizde qylystyq protseste eki fıltr bar. Mysaly, bir adamdy qamaý kerek boldy delik. Ol máseleni prokýror qaraıdy, sodan keıin is sotqa joldanady. Bul - ózindik súzgi. Byltyr tergeýshiler 15 myń adamdy qamaý týraly ótinishpen prokýrorlarǵa keldi. Osy oraıda biz árbir ótinishti qanaǵattandyrýdan bas tarttyq. Nátıjesinde 3,5 myń adam prokýrordyń sheshimimen tergeý kezinde qamalǵan joq. Al qalǵan 11,5 myń adam boıynsha prokýrorlar sotqa bardy. Óz kezeginde sot 500 adam boıynsha bas tartty. Jalpy, prokýrorlar Májilis sııaqty. Óıtkeni Májiliske alǵashqy zań jobalary túsedi, barlyq kemshilikterdi sizder qaraǵannan keıin, Senatqa jiberesizder. Bizde prokýrorlar barlyq kemshilikterdi eskerip, sotqa joldaımyz», - dedi Jaqyp Asanov Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasy talqylaý barysynda.
Bas prokýror quqyq qorǵaý organdaryndaǵy tsıfrlandyrý júıesi saladaǵy qatelikterge jol bermeıtinin atap ótti.
«Eń bastysy - tsıfrovızatsııalaý adam quqyǵyn qorǵaýdy kúsheıtedi. Búkil protsess alaqandaǵydaı aıqyn bolady. Prokýrorlyq baqylaý artady. Sybaılas jemqorlyq azaıady. ІT júıe tergeýshiniń, prokýror men sýdıanyń jumysyn anaǵurlym jeńildetedi», - dedi Bas prokýror.
Bas prokýratýra ázirlegen ІT júıe bıýdjetten qosymsha qarajatty talap etpeıdi. Qylmystyq isterdi tolyqtaı tsıfrlyq formatqa kóshirýdi 2018 jyldyń sońyna deıin aıaqtaý josparlanyp otyr.
